„Порта Македонија“ и спомен-куќата на „Мајка Тереза“ треба да се урнат, а спомениците на плоштадот „Македонија“ во центарот на Скопје треба да се дислоцираат.
Ова е ставот на работната група за проектот „Скопје 2014“, за кои вечерва во „Само вистина“ на Канал 5 ТВ зборуваше и архитектот Мирослав Грчев, кој е еден од четворицата членови.
Според него, рушењето на двата објекти е неопходно бидејќи се противзаконски и се подигнати на улица. Спорно е и тоа што, наведува Грчев, имаме прекршување на Уставот, конкретно во случајот со „Мајка Тереза“ затоа што таа идеја дојде од Никола Груевски како премиер, а е строго забрането централната власт да се меша во уредување на град, нешто што е надлежност на локалната самоуправа.
Рушењето, според архитектот, ќе чини многу малку пари во споредба со сумата што е фрлена за изградба.
„Рушењето на „Порта Македонија“ чини многу поевтино од градењето. Ако градењето чинело 7 милиони, тоа ќе се сруши за помалку од 70 000 евра. „Мајка Тереза“? Два пати помалку“,
рече Грчев.
Кога станува збор за спомениците на плоштадот во центарот на Скопје, пак, тој вели дека треба да се дислоцираат при што нафрли идеја да бидат поставени во „парк на лудоста“.
„За спомениците предлагаме дислоцирање додека бетонските како „Порта Македонија“ и „Мајка Тереза“ мора да се урнат. За спомениците, рушењето може да се однесува на постаментите, а самите скулптури, не може ни така да се наречат, тие можат да се дислоцираат. Ние не влегуваме во конечно решение, немаме таква идеја, постојат инстанци кои се надлежни за тоа. Ако е на ниво на град тогаш Градот треба да пронајде локации за тој „парк на лудоста“, „парк на 21. вековниот македонски фашизам‘“,
рече Грчев.
Овие објекти се во просторот на Мал Ринг, па архитектот во гостувањето на Канал 5, зборуваше и за забелешките кои ги испрати работната група до Општина Центар и градоначалникот Саша Богдановиќ во однос на предлог ДУП-от кој изминатиов период беше на јавна анкета.
Тој го критикуваше предлог-планот дека не само што не се анализираат спомениците и објектите од „Скопје 2014“, туку не се ни споменуваат.
„Спомениците дури се избришани од геодетската подлога, како да му се излекува килим на законитоста од под нозе на планот. Секој урбанистички план за да биде законит мора да биде донесен врз основа на ажурна геодетска подлога“,
рече Грчев.
Тој и работната група вчера испратија заедничко соопштение до јавноста во кое информираа дека ги дале забелешките во рамки на јавната анкета што ја спроведуваше Општина Центар.
„Во општите одредби за спроведување на планот треба да има дел што ќе одреди мерки за враќање на оригиналните фасади на згради што имаат големо значење како културно наследство и високи архитектонски квалитети, како што се зградите на бивша НАМА, ЕВН, МЕПСО и други“,
е една од испратените забелешки за кои вчера пишуваше во сооштението.
Друга, пак, се однесува и на враќање на продаденото земјиште во рацете на државата, како што е парцела во делот каде требаше да никнат „Шпански скали“.
„Со овие забелешки се утврдува политиката на враќање на законот во центарот на Скопје, враќање на правата на граѓаните на јавен простор и визија за градски и граѓански центар ослободен од товарот на фашистоидни и други радикални, националистички и налудничави злоупотреби што го претворија центарот на Скопје во европска престолнина на кичот и политичката злоупотреба“,
порачаа вчера од работната група.
Покрај Грчев кој е координатор, во неа членуваат и Никола Наумоски, Донка Барџиева Трајковска и Златко Теодосиевски.
Работната група за проектот „Скопје 2014“ во 2017 година ја формираше Министерството за култура.
Апели да се повлече предлот ДУП-от за Мал Ринг бидејќи треба да претрпи измени изминатиов период испрати и советничката во Центар, Јана Белчева-Андреевска, Асоцијацијата на архитекти и неколку граѓански организации и здруженија.