Србија и Црна Гора од денеска не се веќе на листата на ЕУ на земји чии граѓани можат да влезат на нејзина територија, со што списокот на безбедни земји е скратен на 12 држави.
Листата, која е составена врз основа на епидемиолошки критериуми, се ревидира секоја втора недела.
Тоа е список на земји за кои „треба да се укинат“ ограничувањата за патување преку надворешните граници на ЕУ.
Таа препорака не е задолжителна, туку секоја земја-членка сама одлучува кои патници ќе ги пушти на своја територија.
За патувањата во Европа, кои не се неопходни, воведена е забрана на 17 март поради спречување на пандемијата на новиот коронавирус.
ЕУ настојува да се координира поради слободата на движење внатре во Шенген просторот.
Отстранувањето на Србија и Црна Гора од белата листа на ЕУ е резултат на загрижувачко зголемување на бројот на заразени со ковид-19 последниве денови.
На списокот на ЕУ сега останаа 12 земји: Алжир, Австралија, Канада, Грузија, Јапонија, Мароко, Нов Зеланд, Руанда, Јужна Кореја, Тајланд, Тунис и Уругвај. Кина, исто така, се наоѓа на листата, но врз основа на реципроцитет.
На листата не се наоѓаат САД, Бразил, Русија и Индија, кои се најтешко погодени земји во светот од ковид-19.