Најголем дел од граѓаните, вкупно 76 проценти, во врска со коронавирусот се информираат од телевизиите, а 49 проценти бараат информации и по социјалните мрежи. Загриженост за себе и за своите блиски поради коронавирусот изразуваат 67 проценти од граѓаните, а 77 проценти ја оценуваат заканата како умерена и голема.
Ова се резултатите од истражувањето на агенцијата Ипсос, спроведено како телефонска анкета на национален репрезентативен примерок од 500 граѓани во државава. Анкетата е спроведена во периодот од 13 до 15 месецов.
„Од податоците може да се заклучи дека граѓаните на Македонија во голема мера се чувствуваат информирани за ситуацијата. Телевизиите секако имаат примарна улога во информирањето на граѓаните, но користењето на неформалните начини на информирање, како социјалните мрежи, укажува дека е потребна зголемена лична одговорност при ширењето на информациите и нивната проверка со официјални извори. Само 16 проценти од граѓаните се информираат од официјалните веб-страници на надлежните институции (Институт за јавно здравство, Министерство за здравство итн.), па одговорноста на сите фактори при информирањето треба да биде зголемена“,
истакнува Ивица Соколовски, истражувач од агенцијата Ипсос.
Истражувањето укажува дека најранливата категорија граѓани, над 65 години се чувствуваат добро информирани за ситуацијата со коронавирусот. Но, од друга страна, младата популација споделува најмала загриженост за себе и своите блиски, истовремено чувствувајќи се најмалку информирани. Четириесет и два процента од младите изјавиле дека се чувствуваат малку или воопшто не се чувствуваат загрижени за себе и своите блиски, со истовремено најнизок процент на испитаници кои изјавиле дека се чувствуваат многу добро или одлично информирани за корона вирусот.
„Пропишаните мерки и начините на кои надлежните институции се справуваат со кризата наидуваат на поддршка од граѓаните, а мал дел од нив изразуваат мислење дека мерките треба да бидат подрастични. Тоа што младата популација се издвојува според својата (помала) загриженост и својата (помала) информираност од корона вирусот, укажува на потребата на зголемена одговорност која младите треба да ја манифестираат во овие моменти. Но не само младите, туку сите сегменти на нашето општество“,
потенцираат од Ипсос.