Граѓаните на С Македонија најрезервирани ако земјава треба да застане во одбрана на нападната земја членка на НАТО

Високи 40 отсто од граѓаните во С Македонија не се согласуваат дека земјава треба да брани друга земја членка на НАТО доколку биде нападната. Дека треба да застане во одбрана на напднатата земја сојузничка одговориле 35 отсто од испитаниците во земјава, а 21 процент ниту се согласуваат ниту не се согласуваат со оваа теза

Македонските државјани се најрезервирани од државјаните на сите други земји членки на НАТО-алијансата за тоа дали нивната земја треба да застане во одбрана на друга членка на Алијансата доколку биде нападната.

Високи 40 отсто од граѓаните во С Македонија не се согласуваат дека земјава треба да брани друга земја членка на НАТО доколку биде нападната. Дека треба да застане во одбрана на напднатата земја сојузничка одговориле 35 отсто од испитаниците во земјава, а 21 процент ниту се согласуваат ниту не се согласуваат со оваа теза.

Ова го покажуваат резултатите од последното испитување на јавното мислење во земјите членки на НАТО, објавено непосредно пред одржување на Самитот на кој се одбележуваат 75 години од формирање на Алијансата.

• Втор ден од НАТО-самитот во Вашингтон

Најголема подготвеност да застанат во одбрана на земја членка на НАТО изразиле граѓаните на Норвешка и Холандија, дури 79 отсто. Збирниот резултат на ова прашање покажува дека 63 проценти се согласуваат оти нивната матична земја треба да брани друга земја на НАТО доколку биде нападната.

Анкетата третира и прашање како граѓаните на земјите членки на Алијансата би се произнеле доколку на референдум имаат можност да гласаат „за“ или „против“ членството на нивната земја во НАТО.

Високи 64 отсто од анкетираните граѓани во С Македонија одговориле дека би гласале земјава да остане членка на НАТО. Дека на евентуалниот референдум би гласале за излегување на земјава од Алијансата одговориле девет проценти од граѓаните, а 27 отсто рекле дека не знаат.

На прашањето дали членството во НАТО ја намалува веројатноста оти земјата ќе биде нападната од странска држава, 61 отсто од испитаниците во земјава одговориле потврдно, 19 проценти одговориле негативно, а 17 отсто рекле дека ниту се согласуваат ниту не се согласуваат со ова.

Сепак, загриженоста помеѓу граѓаните на земјите членки на Алијансата останува висока за можна војна во НАТО, дури 64 проценти. По црногорските државјани, граѓаните на С Македонија изразиле најмала загриженост за потенцијален воен конфликт во рамки организацијата. Четириесет и четири отсто од македонските државјани рекле дека не се загрижени, а 39 отсто изразиле загриженост поради можноста за војна во земјите на НАТО

Во однос на поддршката за Украина, 61 процент се согласуваат нивната земја да продолжи со оваа пракса.

Граѓаните на С Македонија се поделени во однос на прашањето дали треба да продолжи поддршката за Украина. Само 13 отсто од испитаниците во земјава рекле дека целосно се согласуваат за продолжување на поддршката, додека 29 проценти изречно одговориле дека таа не треба да продолжи. Со ова прашање донекаде се согласиле 28 проценти од македонските државјани, а 22 отсто донекаде не се согласиле.

Самитот на НАТО се одржува од 9 до 11 јули во Вашингтон.