Претседателот на РКЕ на дебата во Собранието посочи дека Регулаторната комисија посредувала во проблемите на граѓаните кои добивале несоодветно високи сметки, а за да превенираат, вели тој, граѓаните може сами да ги читаат броилата и да пријават во ЕВН
Пратеничката Ласовска од ВМРО-ДПМНЕ му порача на Бислимоски дека кога тие ќе дојдат на власт ќе го сменат составот на РКЕ, а тој пак рече дека токму ваквите изјави Европската комисија ги смета како притисок врз независноста на Регулаторната комисија
Сите апокалиптични сценарија и најави дека цената на електрична енергија за домаќинствата ќе се зголеми до 50 проценти или ќе има рестрикции не се остварија. Цената се коригираше за 9,48 проценти, а рестрикции нема, посочи Марко Бислимоски, претседател на Регулаторната комисија за енергетика и водни услуги (РКЕ) на седница на собраниската Комисија за економски прашања на која трет ден се разгледува Предлог финансискиот план на РКЕ за 2022 година.
Бислимовски информираше дека во изминатиот период РКЕ посредувала во решавање на проблемите на граѓаните кои пријавиле дека добиле несоодветни високи сметки за електрична енергија.
„Станува збор за несоодветно отчитување. Затоа самите граѓани можат да превенираат и да си го отчитаат броилото и состојбата да ја пријават. ЕВН Хоме е должен да фактурира по состојбата што граѓаните ја пријавиле со самоотчитување“,
рече Бислимоски.
Критики од опозицијата за независноста на РКЕ – Бислимоски потсетува на добрите оцени од Енергетската заедница
Од опозициската ВМРО-ДПМНЕ во дебатата за енергетската состојба и предлог финансискиот план обвинија дека членовите не ги задоволуваат критериумите при нивното бирање и со тоа е доведена во прашање нивната независност.
„За ова малку време што ви остана покажете интегритет. Секако за кратко ќе се смени власта и ќе дојдат луѓе што знаат проблематиката во РКЕ“,
рече Благица Ласовска од ВМРО-ДПМНЕ.
Бислимоски, пак, посочи дека РКЕ во последните три години е оценета за број еден регулатор од страна на Енергетската заедница. Во извештаите, како што рече, е оценета дека го има потврдено кредибилитетот и независноста со тоа што РКЕ има покажано највисока експертиза, стандарди, посветеност и способност да се спротивстави на потенцијалните влијанија врз независноста.
„Во извештајот на ЕК се констатирани политички влијанија, но точно се знае кој ја кочи работата и сака да влијае како што го кочите финансискиот извештај сега. Нема да најдете регулатор во ЕУ каде четири месеци се потребни да се усвои финансиски извештај. И секако овие ваши изјави дека ќе ги разрешите членовите во РКЕ откако ќе дојдете на власт – во Европската комисија ги констатираат како притисок врз независноста“,
посочи Бислимоски.