Лидерот и генералниот секретар на опозициската Алијанса за Албанците, Зијадин Села и Арбен Таравари, не сакаат дополнително да го коментираат партиското соопштение издадено синоќа (четврток, 2 мај), во кое во пресрет на вториот круг од претседателските избори, се наведува: „Вие, почитувани граѓани, сте нашиот суверен и наш партнер во градењето достоинствен живот, затоа ги повикуваме да го изразат својот суверенитет во недела“.
Села не одговори на нашите повици и смс-пораки, а Таравари во телефонски разговор ни рече дека би сакал да остане на соопштението.
И портпаролот на партијата, Флакрон Беџети, посочи на соопштението, без дополнителни толкувања. На прашањето дали лично тој ќе гласа в недела, Беџети рече дека се уште не одлучил.
Соопштението на Алијанса беше повод „360 Степени“ да ги праша граѓаните дали и како го разбираат повикот „да го изразат својот суверенитет во недела“. За повеќемина од анкетираните овој дел од соопштението е нејасен. Некои, пак, сметаат дека тоа е повик за самите да решат дали ќе гласаат и за кого.
За разлика од неодредениот став на Алијанса за Албанците, кандидатот за претседател на државата што го поддржаа во првиот круг, Блерим Река, и Движењето БЕСА излегоа со јасен повик до граѓаните да излезат на гласање в недела (5 мај).