Откако добиле покана по телефон, градоначалничката на Битола, Наташа Петровска, и првиот човек на Карпош, Стефан Богоев, се појавиле во Основното јавно обвинителство за гонење организиран криминал и корупција за да дадат изјава за аферата „Рекет“. Од Обвинителството не соопштуваат што изјавиле Петровска и Богоев.
Оттаму велат дека освен прибирање вербални докази, во континуитет се даваат насоки и наредби за други истражни дејствија во овој случај.
„Вештачењата на прибраниот обемен материјал од извршените претреси е во тек. По наредба на Обвинителството се врши и вештачење на содржината на пронајдениот и одземен втор мобилен телефон на јавниот обвинител“,
се вели во соопштението на Основното јавно обвинителство за гонење на организиран криминал и корупција.
Градоначалници на неколку општини, меѓу кои можеа да се препознаат Битола и Карпош, се споменуваа во текстовите на новинарот Бранко Геровски, како адреси на кои осомничените, но и другите лица, барале услуги и тргувале со влијание.
За случајот „Рекет“ засега се осомничени Бојан Јовановски познат како Боки 13 и Зоран Милевски–Кичеец. Двајцата се во притвор. Тие се товарат за тргување со влијание. Рекетирале лице осомничено во случај на СЈО, повикувајќи се на блискост и влијание врз „јавен обвинител“ – услуга за која од него барале 8 милиони евра.
Обвинителството досега одзема и два мобилни телефона од специјалната јавна обвинителка Катица Јанева за да се провери дали таа имала комуникација со осомничените. Јанева пред неколку дена изјави дека е чиста и дека и таа слушала гласини дека не само Боки 13 туку и многу други лица го злоупотребувале нејзиното име.