Настапот на српскиот турбофолк пејач е во чест на Денот на рударите, како и по повод 29 август, прославата на патрониот празник на градот, Јоаким Осоговски, вели градоначалникот Сашко Митовски
Според плакатот кој го објавија медиумите Аца Лукас е најавен дека ќе настапи на 28 август, како дел од „Џој фест“, а не на 29 август. Македонските изведувачи се предвидени за 27 август. На самиот плакат стои дека овој настан е финансиран од Министерството за култура
Откако Министерството за култура објави дека нема да префрли средства на Општина Крива Паланка за организирање на музичкиот фестивал „Џој Фест“, бидејќи организаторот како еден од учесниците го ангажирал српскиот турбофолк пејач Аца Лукас, кој не бил ставен во апликацијата за добивање буџетски средства, градоначалникот на Крива Паланка, Сашко Митовски, денеска изјави дека настапот на српскиот турбофолк пејач е во чест на Денот на рударите, како и по повод 29 август, прославата на патрониот празник на градот, Јоаким Осоговски.
„Парите од Министерство за култура не се префрлени на сметка на општината, досега само е склучен договор. Настапите на сите учесници на ‘Џој Фест’, кои се исклучиво македонски изведувачи, како и концертот на Аца Лукас, веќе се платени од спонзори. Министерство за култура не мора да ги префрла предвидените средства, иако станува збор за недоразбирање. Тие средства, вкупно 153 000 денари секако беа наменети за македонските пејачи кои ќе настапат на ‘Џој Фест’ – Каролина Гочева, Бени „Нон Стоп“, Гоце Саф, ‘Бас брадарс’ и други, што значи исклучиво македонски пејачи. Но, и за нив тие 153 000 денари од Министерство за култура не се доволни, поради што бројни спонзори и донатори обезбедија средства и овие пејачи веќе исплатени“,
изјави градоначалникот Митовски.
Митовски нагласува дека Аца Лукас не е дел од фестивалската програма, туку ќе пее по повод празникот на градот, прогласен за неработен ден во општината, прославата на патронот на познатиот манастир „Св. Јоаким Осоговски“ и Денот на рударите и е по желба на жителите.
„Со парите од Министерство за култура не ни може да се плати Аца Лукас, а искрено и дел од македонските пејачи. Аца Лукас чини 15.000 евра, а од Министерство за култура добивме 153.000 денари (околу 2.500 евра) како кофинансирање за учество на домашни пејачи. Мене навистина ми е жал за ваквата одлука и за недоразбирањето. По оваа информација јас се слушнав со министерката, на која и реков дека не мора да ги исплатат, бидејќи и настапите на домашните изведувачи ќе ги покриеме со спонзори. Општината учествува само со 600 000 денари, а останатите пари за другите манифестации, меѓу кои и концертот на Лукас се спонзорства. Концертот на Аца Лукас еден од поголемите спонзори е и самиот рудник во Крива Паланка, „Булмак 2016“, бидејќи, како што реков, неговиот настап е за Денот на рударите, по нивна желба“,
изјави Митковски.
Министерството за култура вчера соопшти дека ќе ги стопира буџетските средства наменети за Здружението за културни и уметнички дејности „Џој Фест” од Крива Паланка, откако во јавноста се појави информацијата дека ќе настапува познатиот турбофолк пејач од Србија.
Во соопштението од Министерството за наведува дека во апликацијата до Министерството за култура биле наведени други изведувачи, а не пејачот од Србија.
„Поради непочитување на критериумите и вметнување на турбо-фолк пејач во програмата, тие нема да ги добијат овие средства“,
се вели меѓудругото во вчерашното соопштение.
Според плакатот кој го објавија медиумите Аца Лукас е најавен дека ќе настапи на 28 август, како дел од „Џој фест“, а не на 29 август. Македонските изведувачи се предвидени за 27 август. На самиот плакат стои дека овој настан е финансиран од Министерството за култура.