Арсовска со партијата Нова алтернатива, на чие чело застана во јануари годинава, учествуваше на парламентарните избори што се одржаа завчера и беше носител на пратеничка листа во изборната единица 1, но освои мал број гласови
Градоначалникот на Општина Гази Баба, Бобан Стефковски, кој е од редовите на ВМРО-ДПМНЕ, ја повика актуелната градоначалничка на Скопје, Данела Арсовска, да си поднесе оставка имајќи го предвид резултатот што таа и нејзината партија го постигнале на завчерашните парламентарни избори.
Според Стефковски, по ваквиот резултат е јасно дека Арсовска го загубила кредибилитетот да продолжи да го води Градот Скопје.
Арсовска со партијата Нова алтернатива, на чие чело застана во јануари годинава, учествуваше на парламентарните избори што се одржаа завчера и беше носител на пратеничка листа во изборната единица 1.
„Бројките велат дека во 2021 година Данела Арсовска е избрана за градоначалник на Градот Скопје со гласовите на 118 545 скопјани, а на вчерашните избори Данела Арсовска преку нејзината партија во општините Гази Баба, Ѓорче Петров, Бутел, Чаир, Кисела Вода, Аеродром, Центар, Сарај и Шуто Оризари освои вкупно 2584 гласа. По ваквиот резултат, јасно е дека Данела Арсовска го загуби кредибилитетот да продолжи да го води Градот Скопје“,
напиша Стефковски на Фејсбук.
Според него, гласачите во Скопје на парламентарните избори ѝ порачале на Арсовска дека е време да си замине.
„Скопје им припаѓа на скопјани, а не на Данела Арсовска. Скопјани вчера ѝ порачаа на Арсовска дека е време да си замине! Затоа ја повикувам Данела Арсовска да поднесе оставка од функцијата градоначалник на Градот Скопје бидејќи тоа е волјата на скопјани“,
порачува градоначалникот на Гази Баба во објавата.
Партијата Нова алтернатива на завчерашните парламентарни избори, според конечните првични резултати што ги објави Државната изборна комисија (ДИК) на својата веб-страница, освои вкупно 3 516 гласа, далеку од доволно за има претставник во Собранието.
Арсовска беше носител на листата на Нова алтернатива во изборната единица 1, во која влегува дел од територијата на главниот град и освои 1 645 гласа. Во изборната единица 2, во која влегуваат неколку скопски општини, меѓу кои Гази Баба, Бутел, Ѓорче Петров, Шуто Оризари и Сарај, Нова алтернатива, според податоците на ДИК, освоила 1 113 гласа.
Инаку, Арсовска на локалните избори во 2021 година победи и стана градоначалник на Скопје како кандидат на ВМРО-ДПМНЕ. Неполна година подоцна во јавноста почнаа да се наѕираат несогласувања меѓу неа и партијата, кои во втората половина на 2022 година прераснаа во отворено непријателство.