Сметам дека темата која се обидува да се наметне вчера и денеска, а особено моментот кој се поврзува со национализам е неприфатлив и јас и советничката група на ВМРО-ДПМНЕ во Општина Бутел го отфрламе, рече градоначалникот на Бутел во изјава за медиумите
Градоначалникот на Општина Бутел Дарко Костовски ги отфрли како неприфатливи обвинувањата на ДУИ дека со иницијативата за повторно враќање на старите имиња на дел од улиците во општината, а кои сега носат имиња на личности од албанска етничка припадност, тој и партијата на која и припаѓа, ВМРО-ДПМНЕ застапуваат шовинистичка политика, која го предзвика соживотот во земјата.
„Најнапред многу ми е жал што се потенцираат тие 20 улици со албански имиња. Станува збор за 38 улици од кои половина се со албански имиња, половина не се, има некои македонски имиња, странски имиња. Веднаш го отфрлам тврдењето дека станува збор само за улици со албански имиња“,
рече денеска Костовски во изјава за медиумите.
Тој посочи дека станува збор за иницијатива со која се бара да се врати старата состојба со имињата на улиците, односно, како што рече, да ја поништи насилната одлука на поранешниот градоначалник на Скопје Петре Шилегов.
„Морам да напоменам бидејќи гледам дека за оваа тема се зборува дека има национализам и слично. Меѓу потпишаните во оваа иницијатива има и Албанци. Законот за определување на имиња, улици, плоштади, мостови и други инфраструктурни објекти регулира како се врши именување на улица. Именувањето се врши кога улицата нема определно име и преименување се врши и е дозволено само кога улицата го нарушува угледот на Република Македонија, се навредуваат национални чувства на граѓаните на Република Македонија или некои други држави. Овие улици чии имиња беа насилно сменети не беа ниту навредливи, ниту пак некоја националност беше навредена, ако некој го смета спротивното слободно можеме да дискутираме. Во таа смисла сите инцијативи од граѓаните на општина Бутел се дадени до нас како Општина, а Општината нема надлежност за истите и ние веднаш ги препраќаме до надлежната институција, која во случајот е Градот Скопје и мислам дека сме постапиле многу правилно. И затоа сметам дека темата која се обидува да се наметне вчера и денеска, а особено моментот кој се поврзува со национализам е неприфатлив. И јас и советничката група на ВМРО-ДПМНЕ во Општина Бутел го отфрламе“,
рече Костовски.
За ова тој реагираше и преку изјава на социјалните мрежи, која потоа беше преточена и во партиско соопштение, а во која наведува дека ДУИ може да предава како се создава шовинистичка политика, а најмалку да обвинува други за такво нешто.
„Прво: Не станува збор за моја иницијатива, туку за иницијатива на деведесетина потпишани граѓани меѓу кои Македонци, Албанци, Бошњаци, Срби, Роми. Иницијативата ја препратив до надлежната институција Град Скопје, во случајов и лично ја поддржувам бидејки станува збор за рационално барање. Второ: Од вкупно 38 улици, 18 се со албански имиња, што значи тезата дека станува збор само за албански улици се поништува. Покрај тоа што советниците на ДУИ и Алтернатива ја имаа на увид граѓанската иницијатива, сепак тие одлучија грубо да ги лажат сограѓаните Албанци дека станува збор за менување на улици само со албански имиња. Општина Бутел е мултиетничка општина, со вакви несериозни и лажни обиди за добивање политички поени нема да постигне ништо ниту ДУИ, ниту било која друга партија“,
изјави градоначалникот на Општина Бутел.