Откако утринава, жителите на улицата „Питу Гули“ на Водно алармираа дека непосредно над нивните куќи, на ридот Големо Курило, инвеститорот „Маркеза“ започнал сеча на дрвја, од Град Скопје излегле на терен да проверат што се случува. Оттаму велат дека не издале одобрение за сечење на дрвја, но и дека на парцелата не затекнале масовна сеча. Сепак, повторно ќе направат инспекциски надзор за, како што велат, целосно расветлување на случајот.
„Град Скопје нема издадено дозвола за сечење дрва на парцелата за која покажувате интерес. Градските инспектори веднаш извршија вонреден инспекциски надзор, при што е констатирано дека исеченото дрво било суво. За целосно расветлување на случајот ќе биде извршен повторен инспекциски надзор“,
одговорија од прес-службата на Град Скопје за „360 степени“.
Ова е спротивно на тврдењата на жителите од улицата „Питу Гули“ кои алармираа дека утрово, во очи Нова година, се исечени не едно, туку повеќе дрвја. Велат дека на секое паѓање на стебла негодувале, а кога се обидувале да фотографираат, работниците зад оградата бегале од нив. Се сомневаат и дали надзорот е направен на точна локација.
Станува збор за земјиште на фирмата „Маркеза“, која неделава го огради просторот за кој има правосилна дозвола за изградба на куќа.
Сечата на Водно следува неполни 24 часа по седницата на Општина Центар, на која советниците одлучија Општината во име на граѓаните да побара Државниот инспекторат за урбанизам и градежништво да направи вонреден надзор за целиот детален урбанистички план Ј07, донесен во 2014 г. со спорно мнозинство и со низа контрадикторности.