Како што објави денеска Сител телевизија, повикувајќи се на „извори упатени во процесот“, големи се шансите мостот „Беласица“ да биде срушен и одново да се гради. Според изворите, на надлежните ќе им биде многу тешко да најдат фирма која ќе гарантира дека мостот во ваква состојба е безбеден за сообраќај
Да не се шират дезинформации во врска со состојбата на мостот „Беласица“ кој неодамна беше опожарен, апелираат преку соопштение од Градот Скопје. Оттаму посочуваат дека во моментов се работи на вештачење на состојбата на мостот со цел утврдување дали воопшто има структурно оштетување, по што ќе се направи проценка дали во наредните денови ќе се врати во употреба веднаш, или, пак, ќе има каква било интервенција пред да се стави во употреба.
„Во моментот мостот е затворен како превентива, сè додека не добиеме уверување од релевантните институции дека е безбеден или дека треба да се интервенира. Несериозно е од декани, неименувани експерти како и неименувани ‘извори’ да се предизвикува паника кај граѓаните. Ги демантираме дезинформациите и паушалните раскази на медиуми кои ја користат оваа ситуација за водење на политичка агенда која на ниту еден начин не помага на разрешување на ситуацијата и апелираме да не се предизвикува паника во јавноста со паушални изјави кои не се базирани на никакви информации, вештачења ниту, пак, истражувања“,
стои во соопштението на Град Скопје.
Како што објави денеска Сител телевизија, повикувајќи се на „извори упатени во процесот“, големи се шансите мостот „Беласица“ да биде срушен и одново да се гради. Според изворите, на надлежните ќе им биде многу тешко да најдат фирма која ќе гарантира дека мостот во ваква состојба е безбеден за сообраќај.
Претходно, деканот на градежниот факултет во Скопје, Горан Марковски, во изјава за Сител, прогнозираше дека мостот може да остане надвор од употреба најмалку година и пол и тоа под услов доколку веднаш почне да се работи на него.
Мостот „Беласица“ беше зафатен од пожар минатата недела. Огнот веројатно ја нарушил статиката на мостот, а поради безбедност, тој е затворен целосно за возила и за пешаци.
Од противпожарната единица изјавија дека запалена била електрична инсталација и систем за парно греење.