Препораките за заедничко одбележување на историски личности не ги допираат идентитеските прашања, треба да се разграничуваат сегашните и идентите во средниот век, ние не навлеговме во идентитетот на цар Самоил и не може сите фактографски податоци да ги вметнеме во текстовите, порача копретседателот на историската комисија, Драги Ѓоргиев во интервју за Сител. Тој, како што рече, има повеќе толкувања, но во светската медијавистика за цар Самоил доминантна е една теза.
„Консултирамве многу голема литература, наши колеги и она што е доминантно во светската медијавистика е тезата дека цар Самоил ја продолжува традицијата на бугарската државна и црковна традиција. Ние никаде не навлеговме во идентитетот на цар Самоил дали е тој Бугарин. Третирањето на бугарското царство овде е на една средновековна империја на чие чело во еден период е цар Самоил и која најголем дел од медијавистите ја третираат како продолжение на првото бугарско царство“,
изјави Ѓоргиев.
Министерствата за надворешни работи на Северна Македонија и на Бугарија денеска, во исто време, на официјалните интернет-страници ги објавија досега усогласените препораки во Заедничката мултидисциплинарна експертска комисија за историски и образовни прашања.
Препораките за заедничко чествување се однесуваат на сесловенските просветители, св. Кирил и Методиј, св. Климент, св. Наум, како и за цар Самуил. За учебниците досега се усогласени препораки за античкиот период, односно по пет препораки за петти клас во Бугарија и за шесто одделение во Северна Македонија.
За сите пет личности за кои е договрено заедничко чествување, Ѓоргиев во настапот на ТВ Сител рече дека е важно што со нивното наследство тие се присутни во македонската култура и идентитет, оставиле трајни траги за писменост, христијанството, културата. Македонската нација и народ имаат сериозен темел во македонскиот идентитет базиран на дејноста на тие личности.
Не треба да робуваме на тврдењата дека е нарушен македонскиот идентитет, уверува Ѓоргиев.
„Лојалностите во средниот век се кон царот и црквата. Нема лојалност кон нацијата, кон народот. Апсолутно не треба да се врзуваат тие две работи“,
рече Ѓоргиев.
Според Ѓоргиев, во однос на учебниците генерална слабост и во Македонија и во Бугарија е инсистирање на изучување античка историја на сегашните современи држави во рамки на границите. Потребна е поширока регионална слика за антиката, посочи тој.
„Двете држави се обврзуваат за многу работи во Протоколот, па и во однос на промените во учебниците. Мора да има реципрочност во обврските. Она што го има преземено како обврска Македонија е 99 отсто поклопено со она што мора да го направи Бугарија во однос на учебници и во однос на заеднички чествувања“,
посочи Ѓоргиев.
Најжестоко прашање, според Ѓоргиев, ќе бидат прашањата околу 19 и 20 век. Следниот состанок на комисијата се очекува да биде кон средината на септември.