Германската метеоролошка служба советува што е можно повеќе да се избегнува да се биде на отворено, а оние што денес мораат да користат автомобил се повикуваат да го приспособат начинот на возење според условите на патот. ДВД, исто така, ги советува возачите да ги наполнат резервоарите со гориво и да носат со себе ќебиња и топли пијалаци
Низ Германија има проблеми поради голомразица што се појави на патиштата и тротоарите. Метеоролозите имаат издадено предупредувања за речиси цела држава, наставата е откажана, има прекини во воздушниот и железничкиот сообраќај, а на патиштата има голем број сообраќајни несреќи во кои има и загинати.
Германската метеоролошка служба (ДВД) издаде сериозни предупредувања за опасни временски услови поради замрзнатиот дожд, кој предизвикува речиси невидлив слој мраз на земјата. Издадени се предупредувања за делови од сите германски сојузни покраини. Поради мразот, можен е застој во сообраќајот, а наместа се непроодни патиштата и железницата.
Замрзнат дожд со формирање тенок слој мраз на патиштата најпрвин се појави во западниот и северозападниот дел на земјата, а потоа и во централниот дел. Замрзнат дожд во текот на денот ќе биде широко распространет и на североисток и исток, соопшти ДВД.
ДВД советува што е можно повеќе да се избегнува да се биде на отворено, а оние што денес мораат да користат автомобил се повикуваат да го приспособат начинот на возење. ДВД исто така ги советува возачите да ги полнат резервоарите и да носат со себе ќебиња и топли пијалаци.
Поради опасното време, наставата е откажана во голем број области во Долна Саксонија (вклучувајќи ги Хановер и околината), Хесен, Рајнланд-Пфалц, а наставата е делумно откажана во областа Бад Кисинген. Во училиштата во Бремен присуството е задолжително само од третиот час.
Низ Германија се регистрирани голем број сообраќајни несреќи поврзани со временските услови, кои резултираа со неколку повредени и жртви.
Во сообраќајна несреќа на автопатот 27 меѓу Бремен и Хановер загина 25-годишен возач. Портпаролот на полицијата изутрината изјави дека автомобилот излетал од патот поради лизгавиот коловоз. Несреќата предизвика сообраќаен колапс. Четири лица се повредени во судир на два автомобили на пат покриен со снег во близина на Гагенау (област Растат). Во ударот останал заробен 34-годишен возач и морале да интервенираат спасувачи за да го извлечат од автомобилот.