Владиниот портпарол Душко Арсовски денеска изјави дека Владата не се откажува од најавениот ветинг во правосудството, и покрај тоа што процесот изгубил на интензитет поради пандемијата со коронавирусот бидејќи дел од судиите се заразиле, а дел биле во самоизолација.
Сепак, годинава, според информациите што ги сподели, почнати се постапки против 83 судии, а како причини се наведуваат застареност и несоодветно постапување по предмети и слично.
На прес-конференцијата во Владата, Арсовски појасни и дека државата може да даде само времена рамка за овој процес, а самиот процес треба да го завршат Судскиот совет и Советот на јавни обвинители.
„Државата не може да ја направи филтрацијата. Овој процес треба да го завршат Судскиот совет и Советот на јавни обвинители. Државата може да даде само временска рамка и начин како тоа да се направи. Според информациите што ги имаме, од 2019 до 2020 година само Судскиот совет разреши осум судии, а оваа година се почнати постапки за 83 судии. Причините се застареност на предмети, несоодветно постапување по предмети и слично“,
рече Арсовски.
Како и да е, порача тој, процесот ќе биде остварен.