Според пишувањата на Вељаноски, за излез од оваа ситуација потребно е согласно член 67 став 2 од Деловникот за работа на Собранието минимум 20 пратеници да бараат продолжување на 123 седница, а претседателот на Собранието согласно член 24 став 2 од Законот за Собрание да постапи и да свика ад хок координација на која би се договорил датумот на продолжување на 123. седница на Собранието, кога ќе треба да се гласаат уставните измени
Во врска со писмото на Вељаноски денеска за коментар од новинарите беше прашан и премиерот Димитар Ковачевски кој рече дека за толкувањето на Деловникот треба да се разговара со претседателот на Собранието, со оглед на тоа што Владата не раководи со седниците во парламентот. Колку добар бил Вељаноски, искоментира премиерот, можевме да видиме на 27 април 2017 г.
Поранешниот собраниски спикер Трајко Вељаноски денеска преку писмено соопштение дава коментар околу седницата на која треба да се гласаат уставните измени, а која беше прекината откако се изгласа дневниот ред и пријавените пратениците за збор ги изнесоа своите коментари. Писмото на Вељаноски денеска остана некоментирано од актуелниот претседател на Собранието од чиј кабинет посочија дека Џафери ставот околу таа седница го изнел на 21 август.
Вељаноски, во писменото соопштение, цитирајќи членови од Деловникот, вели дека гласањето на уставните измени мора да се случи најдоцна денеска.
„Согласно член 196 став 1 од Деловникот за работа на Собранието на Република Македонија претресот за измена на Устав трае 10 работни денови и по завршување на претресот се пристапува кон гласање. Денес, на 1 септември завршуваат десетте работни денови откако беше отворена постапката и завршена расправата за измена на Уставот на собраниската седница број 123, закажана и одржана на 18 август. Гласањето мора да се случи најдоцна денес. Секое спротивно постапување не е во согласност со Деловникот“,
наведува Вељаноски во соопштението.
Деловникот за работа на Собранието на Република Македонија, според Вељаноски, не дозволува неизвесност со постапката од толку високо значење.
„Во согласност со Уставот на Република Македонија односно неговиот член 67 и во согласност со Деловникот за работа на Собранието, односно неговите член 6 и член 60, претседателот на Собранието единствено го претставува Собранието и се грижи за примената на Деловникот и за остварување на правата на сите пратеници подеднакво. Политичките одлуки ги носи Собранието, а не претседателот на Собранието“,
додава Вељаноски.
Според пишувањата на Вељаноски, за излез од оваа ситуација потребно е согласно член 67 став 2 од Деловникот за работа на Собранието минимум 20 пратеници да бараат продолжување на 123 седница, а претседателот на Собранието согласно член 24 став 2 од Законот за Собрание да постапи и да свика ад хок координација на која би се договорил датумот на продолжување на 123. седница на Собранието, кога ќе треба да се гласаат уставните измени, вели тој.
„Доколку, и покрај барањето на минимум 20 пратеници, претседателот на Собранието на Република Македонија не закаже продолжение на седницата, како што вели Вељаноски, ја презема на себе целата одговорност, прави лоша практика, се става над сите пратеници и конечно го изместува целосно политичкиот систем на институционалната поставеност на уставното уредување на Република Македонија“,
додава поранешниот претседател на Собранието.
Според него, во досегашната пракса на Собранието на Република Македонија никогаш не се случило да се покрене постапка за измена на Уставот без претходно обезбедена политичка согласност од најмалку двотретинско мнозинство од пратениците. Единствен исклучок, додава Вељаноски, е оваа постапка и насилната постапка за измена на Уставот по Преспанскиот договор.
Во врска со писмото на Вељаноски, од кабинетот на сегашниот претседател Талат Џафери рекоа дека тој денеска нема да има никаков коментар и дека за тоа веќе говорел на 21 август.
Тогаш Џафери на прес-конференција ја објасни процедурата предвидена со Деловникот на Собранието.
Џафери рече дека постапил врз основа на членот 81 од Деловникот, но кажа и дека врз основа на политичка проценка е донесена одлуката седницата да биде прекината по последниот пратеникот што дискутираше на расправата.
Според глава 5 од Деловникот на Собранието, објасни Џафери, во која се санкционирани надлежностите за свикување, учество во работата, текот на седницата и се по ред чекорите коишто се за текот на една седница.
„Врз основа на тие постапки во глава 5, отпочната е седницата, усвоен е дневниот ред со единствена точка на дневен ред, отворен е претрес, одржан е претрес и завршен претрес со констатација дека претресот по точката е затворен, односно завршен и со констатација дека ја прекинувам седницата и за продолжение на истата соодветно дополнително ќе бидат известени пратениците. Оваа моја одлука произлегува од членот 81 став 1 од Деловникот“,
рече Џафери во објаснувањето дадено на 21 август.
Тој рече дека претседателот на Собранието може да ја прекине седницата ако нема мнозинство пратеници потребно за одлучување и во други случаи кога ќе оцени дека тоа е неопходно. Ова е, како што рече, текстот на став 1 од член 81 врз основа на кој сум ја прекинал седницата, а во ставот 5 се вели „времето за продолжување на прекината седница го определува претседателот на Собранието“ и никој друг.
Во врска со писмото на Вељаноски, денеска за коментар од новинарите беше прашан и премиерот Димитар Ковачевски, кој рече дека за толкувањето на Деловникот треба да се разговара со претседателот на Собранието, со оглед на тоа што Владата не раководи со седниците во парламентот.
„А колку добар претседател на Собранието бил Трајко Вељаноски, тоа можевме да видиме на 27 април“,
искоментира Ковачевски.