Гир: Загрижени сме, во многу случаи на висока корупција има однесување по шаблон кое доведува до застарување на предметите

Видовме во многу случаи кои се однесуваат на корупција на високо ниво одредени повторувања на однесувањето – со враќање на повторено судење и пресуди, кои влијаат на застарување на случаите. Тоа е загриженост. Можеби има силни оправдувања за тие индивидуални случаи, но целокупната повторувачка пракса е загрижувачка. Истовремено, гледаме настани во Судскиот совет, со Обвининтелството за организиран криминал и коруоција, и сите тие отвораат прашалници, рече евроамбасадорот

Сериозно и одблизу ги следиме случувањата во правосудството. Владеењето на правото е фундаметално за Европската Унија и ако имате компромитирано судство, тоа ќе влијае во иднина на обидите за консолидирана демократија и градење напредна и развиена економија, изјави вечерва во интервју за Сител евроамбасадорот во земјава, Дејвид Гир.

Тој не сакаше да ги коментира последните случувања во Судскиот совет со контроверзното разрешување на Весна Дамева од претседателската позиција, но нагласи дека Советот е многу важно тело.

„Нема да навлегувам во деталите од Судскиот совет, не сум упатен во нивните дискусии и не би било прикладно да го правам тоа, но би го кажал следново – Судскиот совет е многу важно тело, одговорен е за промовирање и одбрана на независноста, интегритетот и професионалноста на судиите и затоа е важно што работи, какви одлуки носи и како се однесува“,

рече евроамбасадорот Гир.

Тој додаде дека е многу важно начинот на кој работи Судскиот совет, во ниту еден момент да не стане предмет на надворешни политички вмешувања или финансиски интереси, зашто ако се случи тоа, според Гир, тогаш независноста на судиите ќе биде компромитирана и конечно тоа ќе влијае на правото, генерално.

„Како што кажав, нема да шпекулирам за конкретните случувања во Судскиот совет, тоа е нешто што тие треба да го регулираат, но ќе кажам дека е многу важно, сите членови на Судскиот совет секогаш да дејствуваат со потребното ниво на непристрасност и во интерес и обезбедување независно и професионално судство кое дејствува со интегритет. Не затоа што тоа го бара Европската Унија, туку затоа што е во интерес на граѓаните“,

рече Гир.

Превирања во Судски совет: Дали изборот на нов претседател се одолговлекува зашто Дамева не е формално разрешена?

На прашањето за ситуацијата со Советот на јавни обвинители, кој донесе заклучок да се обрати до Етичкиот совет на јавните обвинители во врска со ставовите на обвинителката Ленче Ристовска, која јавно ја критикуваше работата на Советот и укажа дека постојат политички притисоци врз таа институција, Гир вели дека предизвикот е ист и оти тие се одговорни за промовирање и одбрана на независноста, професионалноста и интегритетот на обвинителите и тоа, рече, е исклучително важна улога.

„Во врска со конкретниот случај кој го споменавте, не ги знам деталите, не сакам конкретно да го коментирам, но би сакал да кажам дека е многу важно ако има свиркачи, тие да можат да дејствуваат без страв од последици. Истовремено и свиркачите треба да бидат одговорни“,

оцени евроамбасадорот.

Ристоска ги разбранува духовите во Советот на јавни обвинители: Ќе се проверува дали со нејзината изјава го повредила етичкиот кодекс на ЈО

Во однос на тоа дали земјава се движи во вистинска насока во реформите во правосудството, како што ЕУ очекува, тој повтори дека одблизу ја следат ситуацијата во редовните извештаи за земјава и даваат оценка како сметаат дека се развиваат работите.

„Низ годините гледавме позитивен прогрес. Но, во последните месеци ние сме загрижени, видовме поголем број случаи, речиси како по шаблон на однесување, кои не се конзистентни со она што би го очекувале од земја која води преговори. Што мислам под земја која води преговори? Минатиот јули отворивте преговори за членство со ЕУ и тоа значи поинакви односи со високо ниво на посветеност. И очекуваме да видиме остварување на полето на владеењето на правото во позитивна смисла. И што мислам конкретно под загриженост? Тоа покрива широк спектар на проблеми кои беа и во фокусот на јавноста. Нема да ги коментирам конкретно, но ќе споменам области на загриженост – видовме во многу случаи кои се однесуваат на корупција на високо ниво одредени повторувања на однесувањето – со враќање на повторено судење и пресуди, кои влијаат на застарување на случаите. Тоа е загриженост. Можеби има силни оправдувања за тие индивидуални случаи, но целокупната повторувачка пракса е загрижувачка. Истовремено, гледаме настани во Судскиот совет, со Обвининтелството за организиран криминал и корупција, и сите тие отвораат прашалници“,

посочи евроамбасадорот.

Тој додаде дека за време на процесот на пристапување на земјава во Унијата, „ЕУ ќе гледа на овие прашања многу внимателно, низ микроскоп, од денот број еден, до денот на зачленување и затоа сите овие настани се следени и затоа изразуваме загриженост за сегашниот развој“.