„Планот за раст е резултат на наше барање, со што можеме да користиме привилегии и можности од зачленувањето во ЕУ пред време, односно додека траат преговорите. ЕУ со конкретен план подготвува шест милијарди евра за Западен Балкан, од кои една милијарда евра може да ги искористи Северна Македонија“, се наведува во соопштението на СЕП за средбата на вицепремиерот за европски прашања со евроамбасадорот Гир по повод Извештајот на ЕК за С Македонија за 2023 година, објавен денеска
Инаку, Извештајот на ЕК нотира бројни забелешки за состојбите во земјава, а меѓу главните се нарушена работа на Собранието поради политичка поларизација, злоупотреба на „европското знаменце“ во носењето закони, неусвојување на уставните измени, отсуство на реформа во јавната администрација, страшна состојба во затворите, голем број напади, закани и застрашувачко однесување кон новинарите, никаков напредок во областа на судството и во областа на превенција и борба против корупцијата
Шефот на делегацијата на Европската Унија во земјава Дејвид Гри попладнево во Владата му го врачи Извештајот на Европската комисија за Северна Македонија за 2023 година на вицепремиерот за европски прашања, Бојан Маричиќ.
За врачувањето на Извештајот, преку писмено соопштение и видео со инсерти од состанокот информираше Секретаријатот за европски прашања (СЕП) на својата официјална веб-страница.
На средбата, на која присутвувале и министерот за надворешни работи Бујар Османи, државната секретарка на СЕП Дрита Абдиу Халили и заменикот шеф на делегацијата на ЕУ Бен Нупнау, се дискутирало за планирањето на следните чекори за реализирање на стратешката цел за приклучување кон ЕУ, планот за раст и реформскиот план за Северна Македонија и Западен Балкан.
Маричиќ изразил благодарност до Гир и Европската Унија за „будното следење и излегување во пресрет на нашита барања“ и посочил дека она што следува е детална анализа на Извештајот од страна на Владата и заложба за продолжување на процесот и успешна реализација на заедничките планови.
На состанокот, според СЕП, посебно внимание било посветено на следните чекори во врска со Планот за раст (на економиите) на Западен Балкан на ЕУ.
Заклучокот е дека Извештајот на Европската комисија е рефлексија на „нашата секојдневна борба за унапредување на општеството“, велат од Секретаријатот за европски прашања.
Вицепремиерот за европски прашања истакнал дека С Македонија продолжува со цврста заложба за спроведување на реформските процеси, поддржувајќи го Планот за раст за Западен Балкан.
„Планот за раст е резултат на наше барање, со што можеме да користиме привилегии и можности од зачленувањето во ЕУ пред време, односно додека траат преговорите. ЕУ со конкретен план подготвува шест милијарди евра за Западен Балкан, од кои една милијарда евра може да ги искористи Северна Македонија. Со Планот за раст се овозможува пристап до европскиот заеднички пазар, што ќе значи силен економски напредок. Тоа значи дека нашите производи и услуги може да се пласираат на ‘Единствениот европски пазар’,
информираат од СЕП.
Целта на ЕУ, се додава, е до 24 март 2024 година да направи прв трансфер на средства кон Северна Македонија и другите земји од регионот на Западен Балкан.
„Владата и администрацијата мобилизираа значајни ресурси и активно учествуваа во скрининг процесот. Ова не значи дека сме ја завршиле работата. Напротив, скрининг процесот ни ја дава основата за дефинирање на идните реформски приоритети од ЕУ агендата, кои треба да се спроведуваат и за кои неминовно е потребен широк општествен консензус. Во таа насока работиме на подготовка на патоказите за владеење на право, реформите во администрацијата и функционирањето на демократските институции. Маричиќ посочи дека нашата иднина ја гледаме во стратешката цел на Владата, да станеме полноправна членка на Европската Унија. Свесни за предизвиците кои претстојат, наша цел е обезбедување европска иднина на Северна Македонија, а со тоа и стабилност, безбедност и просперитет на земјата и на регионот. Следејќи го Планот за раст можеме да се фокусираме на реформите со кои ќе обезбедиме повеќе инвестиции и поголем прогрес на земјата“,
се наведува во соопштението на СЕП за средбата по повод Извештајот на ЕК за С Македонија за 2023 година.
Џафери: Собранието останува отворено за сите укажувања во врска со евроинтеграцијата
Евроамбасадорот Гир денеска беше и во Собранието, каде официјално му го врачи Извештајот на ЕК и на претседателот на Законодавниот дом, Талат Џафери.
„Претседателот Џафери му заблагодари на амбасадорот Гир во име на пратениците за традицијата на презентација на Годишниот извештај на Европската комисија за напредокот на Република Северна Македонија за 2023 година и истакна дека Собранието и понатаму останува отворено за сите укажувања во врска со евроатлантските интеграции на земјата на што амбасадорот Гир искажа силно уверување дека проширувањето останува витална заложба и врвен приоритет на Унијата“,
се вели во краткото соопштение од кабинетот на Џафери.
На средбата, покрај собранискиот спикер, присуствувале и потпретседателите на Собранието, Горан Мисовски и Хусни Исмаили, координаторот на пратеничката група на СДСМ, Јован Митрески, координаторот на Алијанса за Албанците, Атнан Незири, заменик-координаторот на пратеничката група на ВМРО-ДПМНЕ, Дафина Стојановска и генералната секретарка на Собранието, Цветанка Иванова.
Пендаровски: Извештајот дава патоказ за областите во кои треба да посветиме внимание
Инаку, Извештајот од евроамбасадрот Гир прв го доби претседателот на државата Стево Пендаровски, кој за средбата информираше на неговите официјални профили на социјалните мрежи „Икс“ (претходно Твитер) и Фејсбук.
По тој повод Пендаровски на социјалните платформи кратко напиша:
„Извештајот, кој го нотира сработеното од првата фаза за почеток на преговорите со скринингот, прикажува и детална слика за состојбите во македонското општество, а дава патоказ за натамошната работа на институциите, како и областите во кои треба да посветиме внимание“
Евроамбасадорот Дејвид Гир денеска ми го презентираше Извештајот на Европската Комисија за напредокот на Република Северна Македонија за 2023 година.
— Stevo Pendarovski (@SPendarovski) November 8, 2023
Извештајот, кој го нотира сработеното од првата фаза за почеток на преговорите со скринингот, прикажува и детална слика за… pic.twitter.com/8yDQDP3UNz
Инаку, Извештајот на ЕК за Северна Македонија за 2023 година нотира бројни забелешки за состојбите во земјава, а меѓу главните се нарушена работа на Собранието поради политичка поларизација, злоупотреба на „европското знаменце“ во носењето закони, неусвојување на уставните измени, отсуство на реформа во јавната администрација, страшна состојба во затворите, голем број напади, закани и застрашувачко однесување кон новинарите, никаков напредок во областа на судството и во областа на превенција и борба против корупцијата.
Европската комисија забележува дека властите продолжиле да демонстрираат и јавно да ја објавуваат својата посветеност да напредуваат на нивниот пат кон ЕУ, но, нагласува, „сега кога започна процесот на пристапни преговори, треба да се забрза темпото на реформите поврзани со ЕУ“.