Спроведувањето на тие реформи не оди толку брзо како што ние (ЕУ) би сакале, вели евроамбасадорот и посочува дека тој процес треба да се одвива многу подинамично и во него да учествуваат сите политички чинители заедно
Во врска со уставните измени, тој нагласи дека станува збор за суверена одлука што земјата треба самата да ја донесе. Прво што е потребно, вели тој, е да се демистифицира сиот процес и да се разгледаат сите предлози што ќе произлезат од работната група за уставни измени. Со самото придвижување напред, вели тој, С Македонија не ги губи ниту идентитетот, ниту јазикот, ниту историјата
Динамиката на спроведување на реформите во земјава не оди според посакуваното темпо од страна на Европската Унија, изјави евроамбасадорот Дејвид Гир при денешната посета на Крушево. Во врска со уставните измени, шефот на Делегацијата на ЕУ во С Македонија вели дека она што прво треба да се направи е да се демистифицира целиот процес.
Според Гир, процесот на реформи и нивната имплементација треба да се движи многу побрзо и во него треба да бидат вклучени сите чинители во земјата, вклучително и сите политички партии.
„Ако земјата сака да се зачлени во ЕУ, тој процес на реформи треба да се движи многу брзо, што значи дека многу брзо треба да се имплементираат реформите кои, првенствено, се во интерес на граѓаните и, се разбира, тие се во интерес на придобивките кои самата земја и граѓаните ќе ги почувствуваат кога ќе станат членка на ЕУ. Динамиката на спроведувањето на тие реформи не е толку брза како што ние би сакале. Таа динамика на реформите треба да биде многу брза, многу подинамична и тој процес на реформи бара сите чинители во земјата, вклучително и сите политички партии да седнат заедно и да се согласат дека тоа е врвен приоритет за земјата за да може што поскоро да се зачлени во ЕУ“,
изјави евроамбасадорот одговарајќи на новинарско прашање, пренесува МИА.
Шефот на Делегацијата на ЕУ рече дека живееме во посебен историски момент во глобални рамки поради војната во Украина, која значи и засилување на процесот на проширување на Европската Унија. Во тој контекст, огромната можност што ѝ се нуди, според Гир, државата не треба да ја пропушти.
„Земјата треба да се придвижи напред кон ЕУ што е можно побрзо, зашто ова е цел која е реалистична и достижна“,
рече Гир.
Во врска со уставните измени, тој нагласи дека станува збор за суверена одлука што земјата треба самата да ја донесе. Прво што е потребно, вели тој, е да се демистифицира сиот процес и да се разгледаат сите предлози што ќе произлезат од работната група за уставни измени. Со самото придвижување напред, С Македонија не ги губи ниту идентитетот, ниту јазикот, ниту историјата.
„Првата работа што сакам да ја потенцирам, а се однесува на уставните амандмани, тоа е суверена одлука што треба да се носи од самата земја. Треба да се разгледаат сите предлози кои ќе произлезат од работната група за уставните амандмани и, всушност, да се направи, да се објасни експлицитно тоа што стои имплицитно во самиот Устав за да можат луѓето кои се самоидентификуваат како Бугари да бидат вклучени во него. Всушност, со самото придвижување напред вашата земја не го губи идентитетот, не го губи јазикот, ниту пак историјата. Искуството од тие земји кои се зачлениле во Унијата е токму спротивното. Како што земјата напредува на тој пат кон ЕУ, како зајакнува како земја, така и идентитетот и јазикот на земјата во рамките на Европската Унија се засилуваат“,
изјави Гир, пренесува МИА.