Британските медиуми пренесуваат дека министерот за здравство побарал од сојузните влади до средината на декември да подготват центри за вакцинација
Германија може во декември да почне со вакцинирање на граѓаните против коронавирусот, соопшти германскиот министер за здравство Јенс Шпан.
„Има причина да се биде оптимист дека вакцината годинава ќе биде одобрена во Европа. И тогаш веднаш може да почнеме со вакцинирање“,
рече Шпан во интервју за германски РНД.
Британските медиуми пренесуваат дека тој од германските сојузни држави побарал до средината на декември да подготват центри за вакцинација.
„Повеќе би сакал центрите за вакцинација да бидат подготвени неколку дена порано отколку да имаме одобрена вакцина што не се користи веднаш“,
рече Шпан.
Министерот, исто така, посочи дека Германија преку Европската комисија, со билатерални договори и други опции, веќе обезбедила повеќе од 300 милиони дози вакцина, што според него е повеќе од доволно и остава простор за споделување на вакцината со други земји.
Во меѓувреме, земјата се подготвува да ги продолжи рестриктивните мерки и во декември.
Од 2 ноември во сила е т.н. „мек карантин“ поради есенскиот бран на коронавирусот, но бројот на инфицирани не е намален и затоа се планира наместо до 30 ноември, мерките да бидат продолжени и во текот на декември.
Баровите, рестораните, фитнес-центрите, кината се затворени, а училиштата и продавниците отворени. Приватните собири се ограничени на најмногу 10 лица, кои смеат да бидат само од две семејства, а сега во план е тој број да се ограничи на 5.
Вчера шефот на американската програма за брз развој на вакцината за коронавирус, д-р Монсеф Слауи, рече дека првата вакцинација во САД може да започне да се произведува на 12 декември.
Таму веќе две компании, „Фајзер“ и „Модерна“, објавија дека нивните вакцини од досегашните тестирања покажуваат ефикасност од над 90 отсто.