За објектите што се бесправно изградени ќе следуваат санкции, а доколку е потребно, Општина Центар најави дека ќе ги отстранува нелегалните доградби. Притоа, трошокот за отстранувањето би паднал на сопствениците на објектите
Еден ден откако сопственикот на стакларникот на улица „Македонија“, кој функционираше како бутик почна самиот да го отстранува, градоначалникот на Општина Центар, Горан Герасомовски, најави засилени инспекциски контроли на застаклените тераси на рестораните, кафе-баровите и другите локали во централното градско подрачје оти, како што рече, нема да толерира дивоградби.
„Со оваа активност започнуваме да воведуваме ред во начинот на поставување и одржување на летните тераси на кафеаните, рестораните, кафе-баровите и другите локали кои вршат дејност на подрачјето на Општина Центар. Целта е да се отвори просторот и да се ослободат јавните површини и да не им пречат на граѓаните, затоа што јавниот простор е наше заедничко добро“,
изјави градоначалникот на Општина Центар, Горан Герасимовски.
Во акцијата која ќе ја спроведува Секторот за инспекциски работи при Општината, според најавата на градоначалникот, ќе бидат опфатени сите нелегално изградени и застаклени тераси пред и околу локалите кои не поседуваат одобрение за поставување на урбана опрема и друга соодветна документација за истите.
За објектите кои се бесправно изградени ќе следуваат санкции, а доколку е потребно, Општината најави дека ќе ги отстранува нелегалните доградби, а трошокот за отстранување би паднал на товар на сопствениците на објектите.
„Општина Центар повторно апелира до сите инвеститори и сопственици на објекти и доградби да ја поседуваат целосната документација и да ја имаат подмирено комуналната такса“,
порачаа од Општината.
Сопственикот на стакларникот на улица „Македонија“, кој функционираше како бутик вчера почна самиот да го отстранува, откако претходно беше издадено решение за негово отстранување.
Градежен инспектор од Општината во ноември лани издаде решение со кое му нареди на инвеститорот стакларникот кој е доградба да биде отстранет и локалот да се врати во првобитна состојба.
Порано овој локал беше угостителски објекти, а доградбата која е на јавна површина се користеше како летна тераса што, пак, е дозволено.