Велковски наведува дека оваа одлука ја донел поради разочараноста од слабиот потенцијал и несоработката со Арсовска, која, како што тврди, покажува затвореност, слаба динамика и поинакви приоритети од ветените
Наспроти тврдењата на Велковски и ВМРО-ДПМНЕ, од Град Скопје официјално информираат дека генералниот секретар е разрешен поради неговото влијание во спорна тендерска постапка за изведба на пречистителна станица во вредност од 136 милиони евра, средства кои се обезбедени од ЕБОР и ЕИБ
Генералниот секретар на Град Скопје, Ѓоко Велковски, утрово на својот фејсбук-профил објави дека си заминува од функцијата бидејќи, како што наведува, е разочаран од слабиот потенцијал за работа и несоработката од градоначалничката.
Објавата на Велковски на Фејсбук стигна речиси истовремено со соопштението од ВМРО-ДПМНЕ, со текст со истата содржина.
Наспроти тврдењата на Велковски и ВМРО-ДПМНЕ, кратко по нивните соопштенија, од Град Скопје официјално информираат дека генералниот секретар е разрешен поради неговото влијание во спорна тендерска постапка за изведба на пречистителна станица во вредност од 136 милиони евра, средства кои се обезбедени од ЕБОР и ЕИБ.
„Велковски, во петокот е разрешен заедно со в.д директорот на ЈП ‘Водовод и Канализација’-Скопје, Златко Перински, поради обиди за влијание кои се сметаат за тенденција која ги потврдува основаните сомнежи на Град Скопје за самоволие и несоодветно постапување во постапката за избор на изведувач во милионски тендер. Градот Скопје нема да дозволи расипничко трошење на парите на скопјани ниту финансирање лични и теснопартиски интереси. Скопје е град на сите скопјани“,
стои во соопштението од Град Скопје.
Велковски, пак наведува дека оваа одлука ја донел поради разчораноста од слабиот потенцијал и несоработката со Арсовска, која, како што тврди, покажува затвореност, слаба динамика и поинакви приоритети од ветените.
„Оваа моја одлука ја донесов и поради фактот што сум разочаран од слабиот потенцијал за работа и несоработката од градоначалничката Арсовска во реализацијата на капиталните проекти за Градот Скопје. Ветувањето кон скопјани беше модерна метропола, а резултатите да бидат брзи и сигурни. По речиси една година во Градот, можам да кажам дека таму има поединци и професионалци вработени во Градот кои со децении придонесуваат за развој на Градот и им благодарам за соработката, пожртвуваноста и нивниот придонес. Но воедно залуден е мојот и нивниот ентузијазам кога Арсовска покажува затвореност, поинакви приоритети од ветените, слаба динамика во темпото на реализација додека проблемите се наталожуваат. Во таква една ситуација развојот на Градот Скопје не е можен, иако граѓаните со право очекуваа по нејзиното стапување на функција многу повеќе“,
вели сега веќе поранешниот генерален секретар на Град Скопје.
Тој наведува дека причина за оваа одлука е и тоа што деновиве, на негово барање, добил известување од Државната комисија за спречување на корупција (ДКСК) дека ќе мора да избере која функција ќе ја извршува, дали онаа на советник во Општина Чаир, на која претходно бил избран, или генерален секретар на Град Скопје.
„Како човек кој секогаш одговорно и професионално си го извршувал своите работни задачи морам да потенцирам дека за мене беше вистински предизвик да бидам на позицијата генерален секретар на Градот Скопје, особено што тоа е место каде човек може вистински да се вгради во развојот и Скопје и да работи на вистинско решавање на многубројните проблеми на скопјани. На ова место дојдов со ентузијазам и план да воспоставиме вистинска работна пракса и да ги покренеме процесите кои повеќе години претходно беа заглавени и далеку од потребното ниво. Со оглед на тоа што на оваа позиција дојдов откако претходно бев избран за советник во општината Чаир, кое е местото каде што живеам и каде што исто така имам обврска да придонесувам барав Државната комисија за спречување на корупцијата да се изјасни за таквата ситуација. Така овие денови ме известија дека ќе морам да се определам за една од тие две позиции, при што јас донесов одлука да си заминам од позицијата генерален секретар на Градот Скопје и да се посветам на советничката функција каде сум избран од граѓаните на Чаир“,
наведува Велковски.
Тој додава дека ќе продолжи да придонесува за Скопје од позицијата советник во Општина Чаир, како и за ВМРО-ДПМНЕ и членовите на Општинскиот Комитет Чаир кој го предводи.
„Благодарам за укажаната доверба и поддршката од сите мои пријатели и соработници, на поддршката од мојата партија и претседателот Мицкоски со кој продолжуваме да го остварувамe она што неминовно ќе мора да се случи за да Македонија се крене, промени за сигурна иднина!“,
потенцира Велковски.