Гасоводот „Северен тек 2“, кој е веќе завршен, но сѐ уште не добил дозвола за работа, има за цел да ја зголеми испораката на руски гас во Западна Европа
Германија не може да ја исклучи можноста гасоводот „Северен тек 2“ да се искористи како средство за политички притисок врз Кремљ во случај на руска агресија врз Украина, изјави денеска претседателот на германскиот Комитет за надворешни работи Михаел Рот.
„Очекуваме дипломатско-политичко решение, а дипломатските алатки вклучуваат и санкции. Ако навистина дојдеме до санкции, а јас сепак се надевам дека ќе успееме да го избегнеме тоа, тогаш не можеме однапред да ги исклучиме работите што можеби ги бараат нашите партнери во Европската Унија“,
истакна Рот за германската телевизија АРД.
Гасоводот „Северен тек 2“, кој е веќе завршен, но сѐ уште не добил дозвола за работа, има за цел да ја зголеми испораката на руски гас во Западна Европа, но противниците на проектот, вклучително Украина и САД, велат дека тоа ќе ја направи Европа премногу зависна од Русија.
Русија, САД и НАТО преговараат за безбедносните гаранции, меѓутоа засега се на различни позиции, бидејќи Русија бара НАТО никогаш да не ја прими Украина во Алијансата, како и да престане да се шири на исток, додека САД велат дека Русија подготвува воена офанзива над Украина, нешто што Москва упорно го негира.