Коментирајќи ја забелешката од Брисел за честата употреба на скратена законодавна процедура, особено кога иницијативите доаѓаат од пратениците, Гаши вели дека и самиот укажувал на тоа низ институционалните процеси. Сепак, на прашањето дали зад овие пратенички иницијативи, всушност, се кријат владини предлози кои на овој начин поминуваат побрзо и полесно, собранискиот спикер не отфрла дека може да е така
Претседателот на Собранието, Африм Гаши, во интервју за „360 степени“ на МРТ 1, осврнувајќи се на последниот извештај на Европската комисија (ЕК) за земјава, вели дека констатацијата оти парламентот може само делумно ефикасно да ги извршува своите надлежности, зависи од перспективата и методологијата што е употребена. Според него, ако се гледа процентуално и според ефикасноста на донесените закони, овој собраниски состав е меѓу најекспедитивните и најфункционалните.
Во однос на забелешката во извештајот дека Собранието и понатаму не усвоило годишен календар, Гаши потсетува дека во пракса веќе постои висока предвидливост преку динамиката на координациите и седниците кои се одржуваат неколку пати неделно.
Гаши: Нормално дека да било лесно, би се направило тоа во изминатите 35 години. Треба предвидливост да се постави, иако ние направивме максимална предвидливост, знаеме отприлика, значи, сите пратеници, понеделник имаме координација, вторник се седниците, среда имаме продолжение на седницата, се остава и четвртокот. Така што три-четири до пет седници најмалку, значи секоја недела имаат седници и има предвидливост, само треба тоа да го канализираме и да го воспоставиме како практика.
360°: Немате ли капацитет во собраниските служби, оти некој треба да седне тоа и да го срочи во еден годишен календар?
Гаши: Апсолутно, има капацитет, зависи од обемот на законите кои доаѓаат во Собрание и врз основа на тоа треба да се предвидуваат работите. Работиме интензивно на тоа веќе две и пол години, јас се надевам дека во текот на 2027 година тоа ќе го решиме и во идниот извештај тоа нема да го има.
Коментирајќи ја забелешката за честата употреба на скратена законодавна процедура, особено кога иницијативите доаѓаат од пратениците, Гаши вели дека и самиот укажувал на тоа низ институционалните процеси. Сепак, на прашањето дали зад овие пратенички иницијативи, всушност, се кријат владини предлози кои на овој начин поминуваат побрзо и полесно, собранискиот спикер не отфрла дека може да е така.
Гаши: Па можно е, може и така да се каже, не можеме да утврдиме. Ние, јас како претседател на Собрание, кабинетот, службата во Собрание, во архива гледа кој е предлагач. Ако е Владата, се однесуваме така, и ако се пратеници – не можеме да прејудицираме дека, можеме да претпоставиме, но не можеме да тврдиме. Затоа ги прифаќаме такви какви што се.
360°: Држи ли забелешката дека често се користи овој инструмент?
Гаши: Да, држи, точно е и јас сум укажувал цело време на ова. Не само на координација, не само на претставникот на Владата кој доаѓа на координација, исто така и од говорница на Собранието при текот, кога имало некогаш процедурални од опозицијата, тоа сум го потврдил, дека е точно, дека не треба така да се поставува, треба да настојуваме најголемиот дел од законите да се донесат во редовна постапка. Но знаете како е, секој пратеник одлучува сам по која методологија, на кој начин ќе го предложи законот и тоа останува право на предлагачот да ја одреди процедурата. Ние не можеме да ја смениме процедурата како Собрание. Јас кога го прифаќам законот, го гледам во иницијативата на законот, тие ја определуваат и процедурата, и ние сме обврзани да ја прифатиме како таква.
Гаши генерално смета дека извештајот на ЕК има повеќе плусови за парламентот отколку кога било претходно.