Инаку, според пишувањата на „Гардијан“, илјадници луѓе ја напуштиле „Ал Шифа“, но здравствените работници велат дека преостанатите пациенти умираат од недостиг на струја поради интензивните борби меѓу израелските војници и милитантите на Хамас
Стотици пациенти, вклучително и десетици бебиња, остануваат заробени во најголемата болница во Газа додека израелските војници и припадниците на Хамас водат тешки борби околу објектот.
„Гардијан“ прави анализа што се случува во болницара „Ал Шифа“ во Газа и зошто таа е важна за здравствената заштита во Газа?
„Болницата ‘Ал Шифа’ или Дом за исцелување е голем комплекс на медицински установи во градот Газа, односно на северот од Појасот Газа. Болницата се состои од група шесткатни згради. Со меѓу 600 и 900 болнички кревети и илјадници вработени, оваа здравствена установа беше главен столб на локалната здравствена заштита. Од почетокот на војната во Газа, таа стана засолниште за раселените од борбите и континуираното израелско бомбардирање“,
пишува „Гардијан“.
„Гардијан“ ги посочува и спротивставените тврдења за оперативците на Хамас за локацијата на болницата.
„Израел тврди дека Хамас го изградил своето седиште во бункери и тунели под болницата користејќи ги зградата, пациентите и персоналот како жив штит. Официјални лица за безбедност рекле дека по ненадејните напади на Хамас врз Израел во кои загинаа 1 200 Израелци, главно цивили, високи лидери на Хамас биле сместени во ‘команден комплекс’ под болницата“,
се вели во написот.
Дали има докази за тврдењата на Израел, прашува „Гардијан“.
„На неодамнешната прес-конференција, портпаролот на израелската ИД покажал сателитска фотографија од локацијата на болницата со означени елементи од воената „команда“, што тој го опишал како илустрација заснована на „вистинскиот материјал што го имаме во нашите раце“. Во видеото за кое се тврди дека е од сослушување, милитант на Хамас заробен минатиот месец опишува како Хамас „се крие во болниците“. Израел објавил и други докази кои јасно покажуваат тунели во близина или во други медицински установи во Газа“,
се објаснува во анализата.
Но, Хамас и претставниците на здравствените власти во Газа, управувани од Хамас, ги отфрлиле овие тврдења велејќи дека тие се пропаганда што се користи за да се оправдаат нападите врз здравствените установи.
Какви се условите во болницата?
Д-р Гасан Абу-Ситах, британски лекар кој работи во „Ал Шифа“, го опишал израелското тврдење како „чуден изговор“. „Хјуман рајтс воч“ соопшти дека не може да ги потврди израелските наводи.
Инаку, според пишувањата на „Гардијан“, илјадници луѓе ја напуштиле „Ал Шифа“, но здравствените работници велат дека преостанатите пациенти умираат од недостиг на струја поради интензивните борби меѓу израелските војници и милитантите на Хамас.
„Опремата за спасување, како што се инкубаторите, не може да работат без гориво за да работи генераторот. Најмалку 32 пациенти, вклучително и три предвремено родени бебиња, починале во изминатите три дена“, изјавило Министерството за здравство на Газа, управувано од Хамас,
пренесува „Гардијан“.
Според информациите на Светската здравствена организација, во „Ал Шифа“ има меѓу 600 и 650 пациенти, како и 200 до 500 здравствени работници и околу 1 500 раселени лица кои бараат засолниште.
Израелската армија соопштила дека обезбедува безбедни коридори за луѓето да избегаат од интензивните борби на север и да се упатат кон југ, но палестинските власти во „Ал Шифа“ рекоа дека комплексот бил опкружен со постојани силни истрели и израелски снајперисти се насекаде наоколу.
Дали важноста на оваа болница е само медицинска?
Сепак, „Гардијан“ анализира кои се можните исходи од ситуацијата во болницата.
„Постојат различни сценарија. Израелските сили би можеле да се обидат да упаднат во болницата, иако тоа носи големи политички и дипломатски ризици. Хамас би можел да одлучи да се повлече од градот Газа, можеби преку тунелите, јужно од Газа, иако тоа е малку веројатно. Прекинот на огнот – по можниот договор за делумно ослободување на повеќе од 240 заложници земени од Хамас минатиот месец – ќе им овозможи на хуманитарните организации, ИД или други актери да организираат целосна евакуација или испорака на витални материјали во болница“,
се вели во анализата.
На крајот на анализата се потенцира и тоа дека важноста на болницата „Ал Шифа“ не е само медицинска.
„’Ал Шифа’ стана стратегиска цел за Израел, кој ја гледа болницата како центар на административните и воените способности на Хамас. За Хамас и неговите поддржувачи, таа стана симбол на способноста на организацијата да се бори против воено помоќниот непријател. За милиони ширум светот, тој стана симбол на страдањето на невините цивили. Според палестинските власти, убиени се повеќе од 11 000 луѓе, од кои околу 40 отсто деца, а повеќе од половина од населението во Газа остана без покрив над главата“,
стои во анализата на „Гардијан“.