Лабораториски услуги за серолошки анализи на инфективните причинители, според Фондот за здравство, се со референтна цена од 1 100 денари
Фондот за здравствено осигурување ги објави денеска цените на лабораториските услуги во јавното здравство за детектирање на коронавирусот кај пациентите, а по обвинувањата зад кои застана и ВМРО-ДПМНЕ дека бесплатните тестови за граѓаните, всушност, се откупуваат по цена од близу 5 000 денари од Министерството за здравство.
ОД ФЗО велат дека во лабораториската дејност постојат повеќе различни техники за детекција на инфективни причинители, како на пример, серолошки испитувања при кои се детектираат антитела кон причинителот на инфекцијата или молекуларни испитувања при кои се детектира присуството на самиот причинител, во овој случај вирусот.
Фондот, како што соопштија оттаму, има формирано здравствени услуги за лабораториска дејност во зависност од техниката што се користи во здравствените установи кои имаат договор со ФЗО, а се однесуваат за инфекции со коронавирусот:
– Лабораториски услуги за серолошки анализи на инфективните причинители (ЕЛИСА, ИгМ или ИгГ) со референтна цена од 1 100 денари.
-Лабораториски услуги за молекуларни анализи за инфективни причинители, во зависност од техниката (полимеразно верижна реакција – PCR и мултиплекс PCR) и бројот на причинители (еден, повеќе или цел сет на вируси) кои истовремено се детектираат. Постојат повеќе различни лабораториски услуги со референтна цена од 3 000 до 5 500 денари.
Слично како што посочи и министерот за здравство Венко Филипче, од ФЗО нагласуваат дека во сумата на референтните цени се влезени сите трошоци за извршување на овие здравствени услуги, како што се труд на медицинскиот персонал, трошоци за медицински и друг материјал, трошоци за одржување на апаратите и просториите, како и режиските трошоци.
„Сите наведени цени се со партиципација според Одлуката за висина на учеството на осигурените лица во вкупните трошоци на здравствените услуги, а до Фондот се фактурираат без партиципација. Сите наведени цени се објавени во ‘Службен весник’ бр. 18 од 1.2.2013, а се во употреба од 9.2.2013 година. Здравствените установи се одговорни при фактурирање до Фондот да ја избираат соодветната шифра, односно здравствена услуга со референтна цена во зависност од извршената услуга, во случајов лабораториска услуга извршена по соодветна техника и број на причинители кои истовремено се детектираат. За тоа кој тип тест и по која метода е одобрен како дел од протоколот на СЗО за тестирање на инфекција од коронавирусот потребно е да се обратите до Комисијата за заразни болести, Институтот за јавно здравје или Министерството за здравство“,
објаснуваат од ФЗО.