Највисокото правно тело во Франција денеска ја казни државата со десет милиони евра за неуспехот да го подобри квалитетот на воздухот во одредени области на земјата.
Казната доаѓа четири години откако Државниот совет, кој служи како правен советник на Извршниот и Врховниот суд, ѝ нареди на владата да го намали нивото на азотен оксид и штетни честички во повеќе од десет зони, со цел да се усогласат со европските стандарди, објави Ројтерс.
Во својата одлука, судот наведе дека владата на претседателот Емануел Макрон направила премалку за да го подобри квалитетот на воздухот во одредени зони, дека нивото на штетни гасови во 2020 година е превисоко во Париз и вториот по големина град, Лион.
„Мерките преземени од владата се недоволни за одлуката на судот од 2017 година да се смета за целосно извршна“,
соопшти Државниот совет.
Владата се бранеше дека се воведени нови мерки од минатиот јуни за прочистување на градскиот воздух, вклучително и воведување зони со ниски емисии, дека го собвенционирала купувањето електрични и хибридни автомобили и постепено ги исфрлила од употреба котлите за нафта.
Меѓутоа, судот се закани дека ќе ја казнува државата со дополнителни 10 милиони евра на секои шест месеци додека сѐ не се исполнат стандардите.