Свирепото убиство го извршил 18-годишен Чеченец
Претседателот Макрон го оквалификува нападот како тероризам
Терористите нема да ја поделат Франција, порача францускиот претседател Емануел Макрон, како реакција на синоќешното свирепо убиство на наставник по историја во средно училиште во париското предградие Конфлан Сент-Онори, што Макрон го оквалификува како „исламистички тероризам“.
„Еден граѓанин е убиен бидејќи бил учител и ги учел децата за слобода на говор. Цела земја стои зад сите учители. Терористите нема да ја поделат Франција“,
истакна Макрон, кој синоќа го посети местото на трагедијата, додавајќи дека целта на извршителот била слободата на говорот.
Француската јавност е во шок откако вчеравечер беше објавено дека во француско предградие маж обезглавил наставник по историја на час, бидејќи на учениците им покажувал карикатури од пророкот Мухамед.
Полицијата го застрела напаѓачот, а француските медиуми објавија дека осомничениот е 18-годишен Чеченец, роден во Москва. Информацијата се уште не е потврдена.
Четири лица, меѓу кои и малолетник, се приведени поради терористичкиот напад во Франција. Уапсените се роднини на убиецот.
Полицијата го претресува и домот на напаѓачот во предградие на Париз. Претреси се вршат и на други адреси. Според портпарол на полицијата, ќе бидат запленети телефони и компјутерска опрема.