Францускиот тим во полуфиналето на 14 декември ќе игра со селекцијата на Мароко која денеска приреди вистинска сензација, откако со пожртвувана игра успеа да ја совлада репрезентацијата на Португалија со 1-0
Во вториот денешен, воедно и последен четвртфинален натпревар на Светското првенство во Катар репрезентацијата на Франција ја совлада Англија со 2-1 и сега ја дели само уште еден натпревар до ново големо финале и евентуална одбрана на титулата – светски првак.
Со вечерашниот пораз пропадна уште еден сон на „Гордиот Албион“ за втора шампионска титула, по онаа во 1966 година.
Французите го отворија резултатот во првото полувреме со прецизен удар од далечина во 17. минута на играчот од средниот ред, Орелиен Чуамени.
Во вториот дел Англичаните го израмнија резултатот со удар од белата точка, кој го реализираше напаѓачот Хари Кејн. За него ова беше 53-ти гол во дресот на анлиската репрезентацијата со кој се израмни со Вејн Руни на листата на најдобри стрелци во историјата на „Гордиот Албион“.
Победата на Французите им ја донесе најдобриот стрелец во историјата на француската репрезентација, Оливие Жиру.
На оваа средба Антоан Гризман направи две асистенции и стигна до рекордни 28 во историјата на „триколорите“.
Британците имаа шанса да го однесат мечот во продолженија, кога главниот судија по интервенција од ВАР собата досуди втор пенал за англичаните.
Кејн повторно застана на белата точка, но овој пат ја промаши целта, испраќајќи ја топката преку голот.
Францускиот тим во полуфиналето на 14 декември ќе игра со селекцијата на Мароко.
Мароканците денеска приредија вистинска сензација, откако со пожртвувана игра успеаја да ја совладаат репрезентацијата на Протугалија со 1-0.
Со денешната победа Мароко стана првата фудбалска нација од африканскиот континент во историјата која успеала да се пласира во полуфинале на Светско првенство, откако африкански репрезентации ги загубија претходните три четвртфиналиња – Камерун во 1990 година, Сенегал во 2002 година и Гана во 2010 година.
Вчера во драматични натпревари, со пресврти, продолженија и пенал рулет, за пласман во полуфиналето се изборија репрезентациите на Хрватска и Аргентина кои се другата полуфинална двојка.