Родителите на Викторија не можеа да ги задржат солзите и кратко пред новинарите прокоментираа дека правосудството не функционира и дека нема кој да ја спроведе правдата. Нејзината сестра, Лилјана Николова, во изјава за медиумите порача дека овој протест е уште еден глас против неправдите
Пред Основниот кривичен суд во Скопје денеска се одржа мирен протест под мотото „Правда за Викторија“, а преку кој беше искажан револт за тригодишната затворска казна што му ја изрече судот на Јордан Ѓорѓиев, кој на 20 јануари ја прегази 24-годишната Викторија Николова од Радовиш на пешачки премин пред „Сити мол“.
Протестот е во организација на Леонид Даов, партнерот на Викторија, кој исто така беше повреден во сообраќајката.
Со црни маички на кои беше испечатена фотографија од Викторија и натпис „Стоп за сообраќајното насилство“, присутните побараа и Апелацискиот суд во Скопје да ја зголеми казната за осудениот.
На протестот се собраа повеќе десетици граѓани, како и родителите на Николова, а покрај маичките се носеа транспаренти на кои пишуваше: „Палата на неправда“, „Правда за Викторија“, „Убијци возачи, судии без совест“, „Стоп за сообраќајно насилство“, „Три години за убиство на пешачки, три години за 150 ќебапчиња“…
Родителите на Викторија не можеа да ги задржат солзите и кратко пред новинарите прокоментираа дека правосудството не функционира и дека нема кој да ја спроведе правдата.
Нејзината сестра, Лилјана Николова, во изјава за медиумите порача дека овој протест е уште еден глас против неправдите.
„Денес бараме повторно и повторно правда за неправедната пресуда, за целата неправда која ни беше нанесена и сè уште се нанесува. Овој протест е уште еден кренат глас до ова судство и оваа неправда која не боли до коска“,
рече сестрата на Викторија.
И адвокатот на семејството Николови, Владимир Михајловиќ, порача дека најголемата закана за правдата е неправдата и го изрази револтот од тригодишната затворска казна изречена од судот, додека за обвинителството рече дека професионално си ја завршило работата со обвинителниот акт.
„Пресудата од тригодишна казна е под законскиот минимум кој предвидува казна од 4 до 20 години за вакво кривично дело. Да се земе за олеснителна околност тоа што сторителот бил млад е смешно, очекуваме Апелација да му ја зголеми казната, односно бараме да ја добие онаа законски предвидената“,
изјави Михајловиќ.
Пресудата беше изречена пред четири, кога семејството Николови и нивниот адвокат го изразија незадоволството.
„Што да кажеме. Немам зборови, згрозен сум од оваа држава и од судството и затоа има толку голем процент на доверба во судството – нула проценти. Друго немам ништо. Ние како фамилија сме згрозени со ваква пресуда. Немаме зборови, сите ќе ја напуштат оваа држава“,
рече таткото на Викторија дента кога беше изречена пресудата.
Основното јавно обвинителство (ОЈО) Скопје, пак, вчера соопшти дека поднеле жалба бидејќи сметаат дека казната е неадекватна и дека судот повеќе ги ценел олеснителните на сметка на отежнувачките околности.