На прашањето зошто салата не ја подготвиле уште претходно и вакцинацијата да почне викендов, Филипче рече дека ова е сепак нов систем и важно е добро да се постави за да не дојде до хаотични ситуации
Од понеделник во спортската сала „А1 Арена“ во центарот „Борис Трајковски“ треба да започне имунизацијата и за првиот ден закажани се термини за вакцинација за околу 3 000 граѓани. Финалните подготовки се во тек, а денеска се организираше и настан за симулација како ќе тече целиот тој процес.
Од двете страни на теренот, каде до вчера тренираа спортски, сега се поставени пунктови за вакцинација. Во средишниот дел, пак, е просторот за опсервација на пациентите 15-20 минути по вакцинацијата.
Во салата има простор и за итна медицинска помош, доколку има потреба, дел каде ќе се издаваат потврди и датуми за ревакцинација … Пристигнати се и фрижидерите во кои ќе се чуваат вакцините.
Пунктовите за вакцинација во „А1 Арена“ ќе работат во две смени, ќе бидат ангажирани околу 20 медицински сестри и 5 доктори, а салата од понеделник ќе биде работно место и за дел од вработените во администрацијата на Министерството за здравство и Институтот за јавно здравје.
Граѓаните кои ќе се вакцинираат се вработените во критичната државна инфраструктура, како што се полицајците, припадниците на армијата, воспитувачките, новинарите, вработените во службите на Град Скопје и др.
Иако во понеделникот се закажани нешто помалку од 3 000 термини за вакцинација, здравствените власти очекуваат за кратко време бројот на аплицирани вакцини на дневно ниво, заедно со оние од пунктовите ширум земјава, да достигне и до 7 000.
На прашањето зошто салата не ја подготвиле уште претходно и вакцинацијата да почне викендов, Филипче рече дека ова е сепак нов систем и важно е добро да се постави за да не дојде до хаотични ситуации.
Во продолжение погледнете ја галеријата од спортската сала.
