Орденот, како што соопштуваат од кабинетот на Пендаровски, се доделува за големата помош и поддршка на ООН во справувањето со последиците од катастрофалниот скопски земјотрес и за непроценливиот придонес за обновата на градот Скопје, кој прерасна во град на солидарноста и вистински симбол на пријателството меѓу народите
Претседателот Стево Пендаровски вчера попладне во Њујорк ја одликуваше Организацијата на обединетите нации (ООН) со орден на Република Северна Македонија.
Пендаровски му го врачи орденот на генералниот секретар на Обединетите нации, Антонио Гутереш, кој се доделува, како што пишува во соопштението од претседателскиот кабинет, за големата помош и поддршка на ООН во справувањето со последиците од катастрофалниот скопски земјотрес и за непроценливиот придонес за обновата на градот Скопје, кој прерасна во град на солидарноста и вистински симбол на пријателството меѓу народите.
Претседателот Пендаровски остварил и средба со Гутереш. Пендаровски се заблагодарил за посветеноста на ОН во нашата земја и изразил очекување соработката во иднина да продолжи со зголемен интензитет. Тој, пишува во соопштението, нагласи дека континуираниот ангажман на ОН во Северна Македонија придонесува за зајакнување на капацитетот на земјата во клучните сектори за развој на македонското општество.
За време на престојот во Њујорк, претседателот Стево Пендаровски даде интервју за „Гласот на Америка“ во кое одговара на прашања за последните измени на Кривичниот законик. Прашан – дали може да гарантира дека по измените на КЗ, ако Груевски се врати во Македонија, ќе биде изведен пред лицето на правдата, шефот на државата вели:
„Јас тоа како политичар не можам да го гарантирам бидејќи тоа треба да биде активност на правосудните органи, не можам да се мешам во тој дел. Но, ова го тврдам децидно – со последните измени на Кривичниот законик, Никола Груевски нема да се врати во Македонија. Досега не се вратил, поради овие измени нема ни да се врати, тоа е сигурно“.
Повеќе на следниот линк: