Дивоградбата која му претходеше на овој објект стана „национален приоритет“ и симбол за решеноста на новата влада да се бори против криминалот
Основното јавно обвинителство-Скопје денеска поднесе обвинение против сопственикот на дивоградбата пред трговскиот центар „Мавровка“, кој лани во текот на јуни и јули започна да се гради на местото на кафулето „Фонтана“ кое, пак, изгоре во пожар.
По сите перипетии, од неможноста на Општината Чаир да го открие инвеститорот, а потоа и да се најде фирма што ќе ја урне дивоградбата, на истото место, на почетокот на овој месец, почна да никнува нова градба.
Од Општина Чаир за „360 степени“ тогаш изјавија дека за разлика од првиот пат, овој пат столбовите не се армирано-бетонски, туку наликуваат на метални профили.
Како што може да се види од фотографиите денеска, градбата за две недели напредува.
Од Општината Чаир најавија дека објектот е сега под постојан надзор, дали тој е во рамки на даденото одобрение, кое предвидува да не го надминува габаритот на објектот што изгоре во пожарот и дали материјалот е соодветен за ваков тип градба.
До каде е градбата, може да погледнете од фотогалеријата и видеото направени денеска.
