Од власта покрај Ковачевски, може да се забележат и вицепремиерот за европски прашања Бојан Маричиќ и генсекот на СДСМ, Миле Зечевиќ, додека Мицкоски е придружуван од шефот на кабинет Владимир Нелоски и координаторот на пратеничката група на ВМРО-ДПМНЕ, Никола Мицевски
Во Клубот на пратеници во центарот на Скопје започна лидерската средбата помеѓу премиерот и претседател на СДСМ, Димитар Ковачевски, и првиот човек на ВМРО-ДПМНЕ, Христијан Мицкоски.
Ковачевски пристигна прв, 20-ина минути пред договорениот термин во 11 часот. По него набргу пристигна и Владимир Нелоски од ВМРО-ДПМНЕ кој, како што беше објавено во јануари лани, е шеф на кабинетот на Мицкоски и секретар за меѓународни односи во партијата.
Лидерот на опозициската партија пристигна со доцнење од пет минути. Го пречека Нелоски, а во нивно друштво дојде и координаторот на пратеничката група во Собранието, Никола Мицевски.
Од претставниците на власта, пак, во Клубот на пратеници може да се забележи и вицепремиерот за европски прашања Бојан Маричиќ, како и генералниот секретар на СДСМ, Миле Зечевиќ.
Во пресрет на лидерската, премиерот Димитар Ковачевски во неколку наврати порача дека очекува ВМРО-ДПМНЕ да се надмине и да прифати уставни измени и, како што вели, „барем еднаш во овие 32 години независна Македонија да поддржи одлука со која државата ќе се интегрира и во ЕУ“.
Тој посочи дека покрај уставните измени, втора тема ќе бидат односите со соседите.
ВМРО-ДПМНЕ, пак, очекува како неизбежно да се наметне и прашањето за предвремени парламентарни избори.
Во пресрет на лидерската Извршниот комитет на партијата одржа состанок по кој објавија дека го овластиле Мицкоски на средбата да ги афирмира и брани позициите против уставни измени под диктат и во поразителни околности за Македонија.