„За 2022 година, граничната полиција имаше зголемена откривачка активност од 31, отсто при спречување на обидите за илегални преминувања. На границите со соседните земји спречени се 27 391 обиди за илегални преминувања. Јужната граница сè уште е клучна точка за влез на мигрантите и нивно натамошно движење, што се огледа и во бројот на спречени обиди на границата со Република Грција – 24 965, што е зголемување на ваквите обиди за 35,5 отсто“, презентираше министерот за внатрешни работи дел од борбата со илегалната миграција
Граничната полиција минатата година имала зголемена откривачка активност при спречување на обидите за илегални преминувања на државната граница од 31,2 отсто, соопшти министерот за внатрешни работи Оливер Спасовски.
Тој вечерва заедно со директорот на Бирото за јавна безбедност (БЈБ), Сашо Тасевски и шефот на кабинет, Митко Бојмацалиев беа во Демир Капија во работна средба со полициските службеници од пунктот за борба со илегалната миграција и криумчарење мигранти во кој работат и делуваат полициски службеници од повеќе организациски единици во склоп на оперативната акција „Рефлекс“.
„На границите со соседните земји спречени се 27 391 обиди за илегални преминувања“,
рече Спасовски.
Јужната граница, како што истакна министерот, сè уште е клучна точка за влез на мигрантите и нивно натамошно движење. Лани, како што прецизираше тој на границата со Грција биле спречени 24 965 обиди за нелегален влез во земјава, што е зголемување на ваквите обиди за 35,5 отсто.
Илегалната миграција, рече Спасовски, е актуелна тема што во голема мера влиаје врз безбедносната состојба на државата поради што справувањето со неа е еден од стратешките приоритети на Министерството за внатрешни работи.
Од голема важност, како што кажа министерот, е потпишувањето на договорот со Фронтекс и распоредувањето на нивни полициски службеници на границите на нашата држава. Тој посочи дека и во текот на оваа година продолжува спроведувањето на заеднички мешовити патроли со странските полициски службеници од осум земји во рамките на активностите кои започнаа во 2015 за време на мигрантската криза.
Инаку, како што потенцираше Спасовски, денешната посета е почеток на серијата средби што раководството на МВР ќе ги има со полициските службеници на терен.
„На лице место во работна атмосфера ќе имаме можност да посведочиме како се остваруваат задачите и плановите со цел да утврдиме што им е неопходно од опрема, процеси и организација за поефикасно извршување на работните задачи, поефикасна борба со сите видови криминал, борба со корупцијата, а со тоа и гарантирање на безбедноста на сите граѓани“,
рече Спасовски.
Тој истакна дека функционирањето на безбедносниот систем е основа за функционирање на правната држава и изрази уверување дека ваквите активности на терен директно ќе влијаат врз унапредување на ефикасноста на сите организациски единици на полицијата.