Ковчегот со телото на легендарниот фудбалер е поставен на центарот на теренот на стадионот „Урбано Калдира“ каде многу луѓе се приближуваат и му оддаваат почит
Кон стадионот на Сантос „Урбано Калдеира“ се протега километарската колона од приврзаници на бразилската и светска фудбалска легенда Пеле кои сакаат да се простат од него за последен пат.
Ковчегот со телото на легендарниот фудбалер е поставен на центарот на теренот каде многу луѓе се приближуваат и му оддаваат почит.
На стадионот беше и претседателот на ФИФА, Џани Инфантино, кој изјави дека ќе побара од сите членови на оваа организација да именуваат барем еден стадион по Пеле.
Еден од најдобрите фудбалери на сите времиња ќе биде погребан утре, на 3 јануари, на 9. кат на „Меморијал некропол екуменика“, највисоките гробишта во светот.
Од легендарниот фудбалер се простија голем број сегашни и поранешни фудбалски ѕвезди.
Погребната поворка, како што е најавено ќе помине низ населбата во која живее 100-годишната мајка на Пеле, Селест.
Посмртните останки на бразилската фудбалска легенда Пеле беа изнесени од болница и пренесени на стадионот на неговиот поранешен клуб „Сантос“.
Ковчегот беше пречекан со огномет, а е поставен на центарот на теренот на фудбалскиот стадион со цел фановите да може да му оддадат почит.
Пеле почина во четвртокот на 29 декември 2022 на 82-годишна возраст. Во последните неколку години се бореше со здравствени проблеми со бубрезите и простатата. Имаше и операција за отстранување на тумор од дебелото црево во септември 2021 откако тој бил откриен при рутински преглед. Неговата здравствена состојба се влоши во последните неколку недели кога кон крајот на ноември 2022 беше и хоспитализиран.
„Сантос“ е неговиот прв професионален фудбалски клуб каде тој помина и најголем дел од својата кариера. Играњето со професионален фудбал го заврши во клубот „Њујорк Космос“.
Прошталниот натпревар Пеле го одигра во 1977 година. Во него се соочија токму овие два клуба, билетите беа распродадени до последно место, а Пеле одигра по едно полувреме за двата клуба.