Чекаме извештај за штетите од пожарот и мислам дека треба да се прогласи еколошка катастрофа, за што денеска ќе испратиме барање до Владата. Треба да видиме до каде е оваа катастрофа, чадот повеќе од 24 часа го загадува не само воздухот туку и почвата, вели жупанот на Осиечко-барањската жупанија, Иван Анушиќ
Пожарот во кој вчера изгоре големо количество пластичен отпад во фабриката „Драва интернационал“ во Осиек, денеска е под контрола.
„Пожарот е ставен под контрола, веќе нема закана од ширење, ниту има толку многу отворен оган“,
вели жупанот на Осиечко-барањската жупанија, Иван Анушиќ.
Тој посочува дека сега е проблем чадот, кој е интензивен и кој се шири во зависност од насоката на ветрот.
„Тоа е најголемиот проблем во моментов, ја следиме временската прогноза и движењето на ветрот, бидејќи чадот ќе го има уште два-три дена. Пожарникарите од денеска ќе почнат да го затрупуваат пожарот, за да се спречи понатамошно чадење“,
објаснува Анушиќ.
Тој најави дека заедно со градоначалникот на Осиек, Иван Радиќ, денеска ќе испратат писмо до владата во кое ќе побараат да се прогласи еколошка катастрофа, поради последиците од овој пожар во жупанијата.
„Чекаме извештај за штетите од пожарот и мислам дека треба да се прогласи еколошка катастрофа, за што денеска ќе испратиме барање до владата. Треба да видиме до каде е оваа катастрофа, чадот повеќе од 24 часа го загадува не само воздухот, туку и почвата“,
додаде Анушиќ.
Тој напоменува дека сѐ уште е рано да се зборува за причините за пожарот, но се надева дека ќе дојдат форензичари од Центарот за форензички испитувања и вештачења „Иван Вучетиќ“, кои треба да ги утврдат причините за пожарот и што довело до него.
Анушиќ посочува дека утврдувањето на квалитетот на воздухот почнало во средата навечер и дека на некои места квалитетот на воздухот е добар, на други не.
„Проблемот е во ветерот, бидејќи со промените на ветерот се менува и квалитетот на воздухот, па дефинитивно треба да се избегнува контакт со чад. Градот Осиек и северниот дел се безбедни од овој чад, додека јужниот дел на округот е загрозен“,
смета Анушиќ.
Градоначалникот на Осиек, Иван Радиќ, извести дека според податоците на Државниот хидрометеоролошки завод, квалитетот на воздухот во Осиек е сѐ уште задоволителен и оти се следи правецот на ветрот, а доколку сврти кон градот, тогаш ќе бидат преземени одредени мерки.
Командантот на Јавната противпожарна бригада Осиек, Горан Ивковиќ, изјави дека ноќта поминала мирно, а пожарникарите покрај активностите за гаснење на пожарот дежурале и да спречат пожарот да се прошири на остатокот од парцелата.
„Со оглед на тоа што имаме густа вегетација во јужниот дел на опожареното подрачје, денеска ќе спроведеме активности за спречување на можното ширење на пожарот, по што пластичните наноси ќе ги натопиме со вода, а механизацијата ќе се обиде да ги покрие со земја, за да се намали количината на чад“,
рече Ивковиќ.
Началникот на полицијата, Ладислав Беце изјави дека полицијата го обезбедува местото на инцидентот, а кога ќе се создадат безбедносни услови, во соработка со вештаците ќе започне истрагата.
Тој нагласи дека во меѓувреме се утврдуваат сите околности кои довеле до овој голем пожар.
Пожарот, што избувна во средата 40-ина минути по полноќ, на отворената пластична депонија на компанијата „Драва интернационал“ на излезот од Осиек кон Бријесто, вчера попладне е локализиран и е под надзор, информираа претходно од градската управа на Осиек. Голем број пожарникари во средата поминаа повеќе од 20 часа на местото на пожарот. При интервенцијата се повредени тројца пожарникари, од кои еден потешко. Поради изгореници на телото, тој бил опериран и според информациите од болницата во Осиек, се наоѓа во стабилна состојба.
Вчера се огласија и од компанијата „Драва интернационал“, во чиј објект се запали пластиката која се чувала на отворено на површина од неколку илјади квадратни метри. Оттаму рекоа дека огнот зафатил пластични (ПЕТ) шишиња и полиетиленски фолии и дека истрагата за причините за пожарот е во тек.
Од компанијата тврдат дека работат согласно со законските прописи на Хрватска и дека моменталните количини на суровини во магацинот биле во согласност со дозволените.