По повод 18 август – Денот на Армијата на РСМ, владината делегација положи венци цвеќе на Партизанските гробишта во Бутел, и на гробовите на генерал Михајло Апостолски и на починатите претседатели на државата и врховни команданти на Армијата, Киро Глигоров и Борис Трајковски
Делегација на Владата предводена од вицепремиерот за европски прашања, Бојан Маричиќ, а придружуван од министерот за внатрешни работи, Оливер Спасовски и заменик-министерот за одбрана, Башким Хасани, по повод 18 август – Денот на Армијата на РСМ, положи венци цвеќе на Партизанските гробишта во Бутел, и на гробовите на генерал Михајло Апостолски и на починатите претседатели на државата и врховни команданти на Армијата, Киро Глигоров и Борис Трајковски.
„На одбележувањето на 79-годишнината од формирањето на баталјонот ‘Мирче Ацев’, првата регуларна воена единица во Македонија во НОБ по која 18 август е прогласен за Ден на Армијата, одбележуваме и 30 години постоење на Армијата на Република Северна Македонија, се сеќаваме на вековната борба на македонските борци за слобода кои со својата несебична жртва, оставија силен печат вграден во темелите на македонската држава“,
се наведува во владиното соопштение.
Од владата додаваат дека Армијата покажува зрелост, професионалност и посветеност на највисоко ниво, што и се очекува од припадниците на современите вооружени сили и заедно со останатите сојузнички војници на земјите-членки на НАТО, дејствува согласно стандардите на Алијансата, учествува во меѓународни мировни мисии, давајќи свој придонес во зачувувањето на глобалниот мир и безбедност.
Претходно денеска, премиерот Димитар Ковачевски учествуваше на централната свеченост која се реализира во касарната „Илинден“ во Скопје на која Армијата прослави својот јубилеен 30-ти роденден и ги одбележа достигнувањата постигнати во текот на тој период.