„Само го чекаме тој точен момент за да ви го одземеме животот. Постапете веднаш ако вашата желба е да останете живи. Ние сме терористичка организација која се бори и убива за неправди и исто така сме подготвени да гинеме за неа“, пишува во заканата до Јовески
Државниот обвинител, пак, порачува дека се залудни ваквите закани, и дури тие да се и по живот, како оваа, нема да го поколебаат во примената на законите и во професионалното и одговорно постапување
Преку препорачана пратка, испратена по пошта од Битола, вчера до државниот јавен обвинител Љубомир Јовески стигнало писмо со закани по живот. Испраќачот или испраќачите во писмото се претставуваат како терористичка организација и бараат да бидат ослободени од гонење двајцата новинари од ТВ Алфа, Горан Момировски и Драган Милосављевиќ, постапка за која од Јавното обвинителство нагласуваат дека веќе е запрена во декември 2021 бидејќи нема место за гонење од страна на јавен обвинител.
Испраќачот/испраќачите бараат Јовески да го запре гонењето или во спротивно му се закануваат со убиство.
„Новинарите Горан Момировски и Драган Милосављевиќ, слободно да бидат ослободени бидејќи се новинари кои се од највисоки еминентни и заслуги и имаат астрономска поддршка насекаде низ државата, кои ќе се борат и ќе ги бранат до последна капка крв како што овие новинари го претставуваат и се гласот на македонскиот народ. Љубомир Јовески ослободете ги еднаш, ослободете ги од сите обвиненија бидејќи се невини за какво било злосторство или Љубомир Јовески ќе те убиеме многу брзо. Само го чекаме тој точен момент за да ви го одземеме животот. Постапете веднаш ако вашата желба е да останете живи. Ние сме терористичка организација која се бори и убива за неправди и исто така сме подготвени да гинеме за неа“,
пишува во заканата што вчера стигнала до обвинителот.
До него заканата стигнала во две верзии, едната на македонски и компјутерски напишана, а другата рачно напишана на англиски јазик.
Јовески, пак, на ваквите закани возвраќа дека се залудни.
„Јавниот обвинител на Северна Македонија истакнува дека се залудни ваквите закани и во оваа пригода нагласува дека заканите, па дури и да се по живот, нема да го поколебаат во примената на законите и во професионалното и одговорно постапување на Јавното обвинителство. Пратката ќе биде доставена до Министерството за внатрешни работи заради испитување на содржината на наводите и лицето кое ја експедирало пратката“,
велат од Обвинителството.
За новинарите Момировски и Милосављевиќ до Обвинителството беше поднесена кривична пријава од Агенцијата за разузнавање во врска со наводи за безбедносни и разузнавачки структури изнесени во емисијата „Заспиј ако можеш“ емитувана на ТВ Алфа на 11 јануари 2021. Тие во ноември лани беа повикани и да дадат исказ. Меѓутоа, веќе наредниот месец предметот, според денешното соопштение од Обвинителството, бил запрен бидејќи надлежниот обвинител сметал дека нема место за јавно-обвинителско постапување.