Шест меѓународни потерници осамнаа на веб-страницата на Министерството за внатрешни работи (МВР) со кои се бараат осомничените во акцијата „Планина“ која се однесува на трговија со дрога.
Со фотографија и лични податоци во потерницата, тие се бараат како осомничени за кривично дело по членот 215 од Кривичниот законик – неовластено производство и пуштање во промет на наркотични други, психотропни супстанции и прекурсори.
Петмина од нив се од Грчец, а еден од Гази Баба.
Акцијата „Планина“ се однесува токму на две групи од овие две места. Од овие две групи беа приведени 22 лице (14 од Грчец и 8 од Гази Баба), но тие според сознанијата на обвинителството се продавачите, додека оние по кои се трага се наркобосовите.
„За жал, фатени се само продавачите, но Обвинителството располага со доволно докази и за наркобосовите и се надевам дека за кратко време ќе бидат фатени и изведени пред лицето на правдата. Ние за наркобосовите имаме доволно докази, не можат да направат ништо за да ги уништат. А дали ќе собереме доволно докази за вмешаност на полицајци или вработени во други институции, ќе видиме“,
рече шефицата на Обвинителството за гонење организиран криминал и корупција Вилма Русковска по спроведувањето на акцијата за апсење.
Причината за бегството на наркобосовите е тоа што акцијата била пробиена.
При претресите на 26 локации во Грчец и 9 во Гази Баба, не беше пронајдена ниту значителна количина на друга бидејќи местата биле расчистени, а ги немало ни луксузните автомобили на наркобосовите. Но, Русковска тврди дека имаат доволно докази зошто уште на почетокот биле свесни за тоа и собирале докази за секој член на групата поединечно.
Како била пробиена акцијата досега нема информации. Обвинителката рече дека засега немаат сознанија кој ја издал информации, но најави дека од одземените електронски уреди ќе се види дали има поврзаност на групите со припадници на МВР или други институции и уверува дека ако е така, тогаш ќе бидат изнесени пред лицето на правдата.
Министерот за внатрешни работи, Оливер Спасовски во вчерашната изјава за медиумите на оваа тема потенцираше дека истрагата целосно ја води обвинителството и нагласи дека ваква голема акција немало во последните 30 години. Во врска со пробивањето на акцијата рече дека очекува оти Обвинителството ќе најде начин доколку има каков било пропуст да ги најде виновниците и тие да си сносат одговорност за тоа.