Кај Универзитетската клиника за детски болести е поставена монтажен објект кој ќе функционира како општа амбуланта во склоп на оваа клиника, информираа од Министерството за здравство.
Монтирањето на амбулантата е дел од активностите за враќање на редовното работење на клиниките во ситуацијата кога здравствениот систем се справува со ковид-19.
„Во оваа монтажна амбуланта ќе се прегледуваат сите деца кои не се закажани преку електронскиот систем Мој термин. Овие деца досега беа прегледувани во амбулантите во зградата на Детската клиника, а заради актуелната пандемија со ковид-19, пациентите кои ќе доаѓаат на преглед и физички ќе бидат дистанцирани од другите пациенти кои се закажани во Мој термин, со цел заштита од ширење на коронавирусот меѓу пациентите“,
велат од Министерството за здравство.
Во монтажната амбуланта има соба за интервенции, соба за преглед на пациенти, сестринска соба, тоалет, шалтер и чекална за пациентите. Објектот е комплетно климатизиран и треба да функционира согласно сите стандарди за безбеден третман на пациентите.
Монтажната амбуланта на Детската клиника е донација од Македонски Телеком.
Од Клиниката за детски болести напоменуваат дека децата кои се сомнителни или се со симптоми на ковид-19 и понатаму ќе се прегледуваат и хоспитализираат во Болницата за белодробни заболувања Козле и на Инфективната клиника.
Пред два дена Министерството за здравство информираше дека монтажна амбуланта ќе се постави и кај Клиниката за пулмологија. Монтажен објект има и кај Инфективната клиника.