Портретот на Чарлс ќе биде единствената промена на постоечките дизајни од банкноти од пет, десет, 20 и 50 фунти. Остатокот од дизајнот на банкнотите ќе остане ист
Банката на Англија денеска го претстави изгледот на новите банкноти со ликот на британскиот крал Чарлс Трети кои треба да почнат да се користат од средината на 2024 година.
Портретот на Чарлс ќе биде единствената промена на постоечките дизајни од банкноти од пет, десет, 20 и 50 фунти. Остатокот од дизајнот на банкнотите ќе остане ист. Се додава дека ликот на кралот ќе се најде на предниот дел на банкнотите, но и во малиот проѕирен безбедносен печат.
Банката на Англија соопшти дека граѓаните сè уште ќе може да ги користат банкнотите на кои е прикажан портретот на кралицата Елизабета Втора, а паралелно со овие, во оптек ќе бидат и банкнотите со ликот на новиот британски монарх.
„Новите банкноти ќе се печатат само за да ги заменат истрошените и за да се задоволи севкупното зголемување на побарувачката за банкноти. Нашиот пристап е во согласност со упатствата од Кралското домаќинство, за да се минимизираат еколошките и финансиските влијанија од оваа промена“,
наведуваат од банката.
Кралицата Елизабета Втора беше првиот и единствениот монарх што се појави на банкнотите на Банката на Англија, почнувајќи од 1960 година. Банкнотите издадени од шкотските и северноирските банки не го прикажуваа ликот на монархот.
Монетите од 50 пени со ликот на кралот Чарлс веќе беа пуштени во оптек на почетокот на декември.