Од МНР на официјалната веб-страница објавија фотографија на која се гледа дека на министерскиот состанок на НАТО во Букурешт кодот што се користи за македонски јазик е МК
Во НАТО активно се користи кодот МК за означување на македонскиот јазик, а не НМК (од North Macedonia), како што повеќепати се известуваше во јавноста изминатиот период.
На денешниот министерски состанок на НАТО во Букурешт, Романија, можеше да се забележи дека и меѓу кратенките за јазиците во електронскиот систем ознаката за македонскиот јазик е МК.
На овој состанок учествуваат шефовите на дипломатиите на земјите членки на Алијансата, а во фокусот на разговорите биле актуелните безбедносни предизвици, поддршката за Украина, како и последиците од руската воена агресија, меѓу кои енергетската криза и недостигот на храна.
Министерот Бујар Османи, кој учествуваше на состанок, посочи дека НАТО бргу се адаптираше на новите предизвици што ги наметна руската агресија и го нагласи стратешкото значење на регионите на Западен Балкан и Црното Море за Алијансата.
„Безбедноста во Европа е нарушена, руската агресија врз Украина ги урна принципите кои одржуваа мир и стабилност; но НАТО навремено, цврсто и одлучно се адаптираше на новите безбедносни и политички предизвици. Немам дилема дека денес го реафирмираме ова единство, зајакнато трансатлантско сојузништво, но и одлучноста, подготвеноста и засиленото присуство овде, во регионот на Црното море, и по целото источно крило на алијансата“
рекол Османи.
Со колегите од земјите-членки на НАТО, како што соопшти МНР, била реафирмирана поддршката за Украина и украинскиот народ, а се дефинирале и следните чекори за зајакната практична поддршка.
Фотографии од учеството на Османи објави МНР на својата официјална веб-страница, а меѓу нив е и таа на која може да се види дека за македонскиот јазик се користи кратенката МК.
За наводна употреба на кратенката НМК и министерот зборуваше неколку пати во изминатитр месеци, при што велеше дека не се отвораат прашања кои се затворени, бидејќи кодовите за Северна Македонија, потврдени и со Договорот од Преспа, се МК и МКД.
„Пример ќе ви го кажам за случајот во НАТО. Во НАТО секаде е МКД. Но, при сликањето, при распоредување, правилото е да се користи правата буква на државата и таму стои НМК на местото каде што се сликаат министрите. Затоа што такво е правилото. Треба да се смени распоредот на седење. Меѓутоа, во документите каде што во употреба е ИСО-класификацијата, секогаш е МКД. Така е и во Советот на Европа, така е и во секоја организација“,
одговори Османи одговарајќи на новинарско прашање во август годинава.