Претседателката на Европската комисија рече дека нерегуларната имиграција е европски предизвик кој бара европски одговор
Претседателката на Европската комисија, Урсула фон дер Лајен, заедно со италијанската премиерка Џорџа Мелони, денеска го посетија прифатниот центар за мигранти на Лампедуза.
Фон дер Лајен и Мелони утрово пристигнале на малиот италијански остров и го разгледале прифатниот центар. Тие разговарале со некои од мигрантите.
„Даваме сè од себе“,
рекла Мелони, пренесува италијанската новинска агенција АНСА.
Фон дер Лајен и Мелони ги повикаа европските партнери да ѝ помогнат на Италија да управува со миграциските текови од Северна Африка и да прими дел од мигрантите што го преминале Средоземното Море.
„Ова е за иднината што Европа ја сака за себе бидејќи иднината на Европа зависи од нејзината способност да се соочи со големи предизвици“,
изјави Мелони за новинарите во Лампедуза, каде што секое лето пристигнуваат десетици илјади мигранти.
Претседателката на Европската комисија рече дека нерегуларната имиграција е европски предизвик кој бара европски одговор.
Таа апелираше до земјите членки да ги пречекаат доброволно мигранти кои стигнуваат до Италија.
Мелони им замерува на европските партнери за недоволната солидарност кон Италија, која од почетокот на годината прими речиси 130 000 мигранти на своја територија.
Италијанските власти објавија дека повеќе од 5 100 мигранти пристигнале на Лампедуза минатата среда поради што локалниот градски совет прогласи вонредна состојба.
Поради близината со тунискиот крајбрежен град Сфакс, Лампедуза е една од главните дестинации за мигрантите кои се обидуваат илегално да стигнат до европските брегови од Северна Африка.
Прифатниот центар за мигранти на островот е преполн.
Многу од луѓето кои пристигнале во изминатите неколку дена сега се префрлени од Лампедуза на Сицилија или на италијанското копно, со што малку се намалува притисокот врз Лампедуза.