Претседателката на Европската комисија Урсула фон дер Лајен, попладнево порача дека фармацевтската компанија БиоНТех/Фајзер има обврска да ги достави ветените вакцини за втората доза.
Таа порача дека станува збор за медицинска потреба и дека во повеќето земји членки на ЕУ голем број луѓе треба наскоро да ја примат втората доза потребна за заштита од вирусот.
Вакцината на Фајзер, која прва доби авторизација на европскиот пазар, се прима на двапати. Повеќето земји почнаа да вакцинираат кон крајот на декември, а по две или три недели треба да ја примат и втората доза. Меѓутоа фирмата најави неодамна дека набавките ќе бидат забавени во наредниот период, поради што голем број земји ќе добијат помалку вакцини од предвиденото.
Прашанa на оваа тема денеска, Фон дер Лајен порача дека ова не е прифатливо за Европската комисија, која преговараше со фармацевтските фирми за групни набавки.
Претходно, како што јави дописничката на МИА од Брисел, Урсула фон дер Лајен коментирајќи го вакцинирањето потврди дека Европската Комисија ќе предложи механизам за споделување на вакцините со земјите вон ЕУ. Шефицата на Комисијата со ова ја потврди вчерашната најава на еврокомесарката за здравство Стела Кириакидес, за ваков механизам со кој треба да им се помогне на земјите со низок и среден приход кои не можат да си дозволат набавка на вакцини.
Претседателката ги прекори и земјите членки на ЕУ затоа што не покажуваат солидарност за вакцините.
Фон дер Лајен додаде дека „оние кои ќе покажат поддршка нема да бидат заборавени, но оние кои не ја покажуваат ќе бидат запаметени, од многу различни причини“.
„Европа мора да биде на добрата страна на историјата и човечноста“,
порача шефицата на Еврокомисијата.
Според најавата на Кириакидес се очекува ЕК да обезбеди 70 милиони евра за Западниот Балкан за набавка на вакцините и уште 50 милиони евра поддршка преку Светската здравствена организација (СЗО).
СЗО ги предупреди богатите земји во светот дека „себичноста“ за вакцините ќе доведе до морална криза.