На 10 и на 11 мај, според најава на претседателот Пендаровски, во Брисел ќе престојува премиерот Заев, кој ќе има средба со претседателката на ЕК, меѓу другото, како што рече, и за пругата
Претседателката на Европската комисија Урсула фон дер Лајен му испрати писмо на српскиот претседател Александар Вучиќ во кое му се заблагодарува за „продуктивната средба во Брисел на 26 април“ и во кое посочува дека особено се радува на соработката за големиот проект за модернизација на пругата Белград-Ниш-Прешево, на границата на Србија со Северна Македонија, јавуваат српските медиуми.
Фон дер Лајен посочува дека проектот е огромен чекор напред и важна пресвртница во идните односи и додава дека е среќна што овој проект се наоѓа во Економскиот и инвестициски план за Западен Балкан, кој го усвои Европската комисија минатата есен.
Таа додава дека ЕК веќе работи со полна брзина на реализација на проектот.
Фон дер Лајен инсистира на брза и блиска соработка, со цел да се направи што е можно поефикасен проектот за модернизација на пругата.
Вучиќ, како што пренесува МИА, потврдил дека добил писмо од Фон дер Лајан, во кое таа изразува поддршка за проектот за изградба и обновување на пругата од Белград до границата со Северна Македонија.
„Добив исклучително писмо од Урсула фон дер Лајен, кое се однесува на мојот престој во Брисел и на нашиот договор за исклучително важниот, стратегиски проект, пругата Белград-Ниш до граница со Северна Македонија“,
изјави Вучиќ.
Тој оцени дека проектот ја менува сликата за Србија.
„Долго време се немам толку израдувано на некое писмо, особено кога тоа доаѓа од ЕУ“,
додава Вучиќ.
Тој очекува изградбата на пругата Белград-Ниш-Табановце, со поддршка на ЕУ, да почне напролет следната година.
Вучиќ посочи дека, благодарение на поддршката на ЕУ, Србија ќе заштеди од 700 до 800 милиони евра.
Еден ден по посетата на Вучиќ на Брисел, таму отпатува и македонскиот претседател Стево Пендаровски. По враќањето, Пендаровски изјави дека на 10 и на 11 мај во Брисел ќе престојува премиерот Зоран Заев и дека ќе има средба со претседателката на Европската комисија Урсула фон де Лајен, како што рече, меѓу другото, и за пругата.