По повод официјалното стапување на претседателската функција на Гордана Силјановска-Давкова, пристигна честитка и од претседателот на Европскиот совет
Претседателите на Европскиот совет и на Европската комисија, Шарл Мишел и Урсула фон дер Лајен, речиси истовремено упатија честитки до новата претседателка Гордана Силјановска-Давкова по повод нејзиното официјално стапување на функцијата.
„Честитки, Гордана Силјановска-Давкова, првата жена претседател на Северна Македонија. Вашето лидерство доаѓа во клучен момент, додека вашата земја ги унапредува реформите и продолжува на патот кон ЕУ. Со нетрпение очекувам да соработувам со вас“,
напиша Фон дер Лајен во објава на Икс.
Преку истата платформа беше упатена и честитката од претседателот на Европскиот совет, Шарл Мишел.
„Со нетрпение очекувам да соработувам со вас на унапредување на патот на Северна Македонија кон ЕУ, преку спроведување на реформите и обврските. Иднината на Северна Македонија и Западниот Балкан е во ЕУ“,
напиша Мишел.
Неколку часа по инуагурацијата и давањето свечена изјава од новата претседателка, во која не беше изговорено уставното име на земјата, во посебна објава, претседателката на Европската комисија, Фон дер Лајен, напиша дека за Северна Македонија да го продолжи својот пат кон ЕУ, потребно е да се почитуваат меѓународните договори како Преспанскиот.
„За Северна Македонија да го продолжи својот успешен пат во пристапувањето кон ЕУ, најважно е земјата да продолжи по патот на реформите и целосно почитување на нејзините обврзувачки договори, вклучително и Договорот од Преспа“,
напиша Фон дер Лајен.
Тоа што Силјановска-Давкова не го употреби уставното име беше причина за грчката амбасадорка Софија Филипиду да ја напушти инаугуративната седница, а реагираше и грчкото МНР.