Од СВР Охрид посочија дека остануваат на вчерашното соопштение дека кај нив било пријавено оштетување на стаклото на седиштето на здружението, лоцирано на булеварот „Македонски просветители“ во Охрид и оти по пронаоѓање на сторителите против нив ќе бидат поднесени соодветни пријави
Портпаролот на Секторот за внатрешни работи Охрид, Стефан Димоски, во изјава за МИА информира оти полицијата е фокусирана на пронаоѓање на сторителите што го демолираа седиштето на здружението на граѓани „Цар Борис Трети“ во Охрид.
Димовски посочи дека остануваат на вчерашното соопштение дека кај нив било пријавено оштетување на стаклото на седиштето на здружението, лоцирано на булеварот „Македонски просветители“ во Охрид и оти по пронаоѓање на сторителите против нив ќе бидат поднесени соодветни пријави.
Вчера бугарските медиуми објавија, а СВР Охрид потврди дека прозорците од просториите на клубот „Цар Борис Трети“ се оштетени. Инцидентот се случил ноќта помеѓу 20 и 21 ноември меѓу 1 и 2 часот по полноќ, кога прозорците на просторијата биле искршени со тврд предмет, по што полицијата извршила увид.
Бугарската телевизија БТВ денеска објави снимки од безбедносните камери во близина на бугарскиот културен клуб „Цар Борис Трети“ на кои се гледа нападот на клубот.
Според видеото што го објави телевизијата, тројца мажи со маски на лицата фрлаат со предмети, најверојатно камења, кон клубот, при што се кршат прозорците на објектот.