Претседателот на Синдикатот на работниците од управата, правосудните органи и здруженија на граѓани (УПОЗ) Пеце Грујовски денеска најави дека до крајот претстојната недела ќе биде потпишан колективен договор за јавната администрација.
Тој признава дека преговорите траеле малку подолго, но како причина го наведе тајмингот – пред и после избори, кога според него администрацијата е на удар на партиите и од едната и од другата страна.
„Не може да се генерализира дека јавната администрација не работи и не е ефикасна. Како и во сите други дејности, секаде има работници и неработници. Има раководители кои тоа треба да го санкционираат и кои треба да ги наградат добрите работници“, рече претседателот на УПОЗ.
Сепак, како што потенцира на општо задоволство на Синдикатот, колективниот договор што треба да се потпише обезбедува соодветни права за јавната администрација, но се разбира и обврски.
Преговорите за нов колективен договор започнаа пред нешто помалку од две години.
Претставниците на Синдикатот на УПОЗ инсистираа да бидат утврдени поголеми права за членовите на Синдикатот и, иако имаше спротивставени ставови во поглед на ова прашање, се заклучи дека треба да се разгледаат искуствата од регионот.
Исто така, едно од прашањата за кои се разговараше беше и учеството на Синдикатот во изготвување на законите и подзаконските акти што ја уредуваат работата на вработените, а особено во подготвување на правилниците за систематизација на работни места.
Доколку се потпише, овој колективен договор ќе биде прв грански колективен договор за административните службеници и правосудните органи по 1995 година.