„Ниту еден истражен центар не може да функционира и да одговори на задачите без современа опрема, без средства за преземање на истражните дејствија, за што сега во главно се потпираме на донации. Правдата е инвестиција на целата држава“, посочил државниот јавен обвинител на работниот состанок на истражители од ОЈО ГОКК и од основните јавни обвинителства во Скопје, Куманово и Тетово
И покрај заложбите за јакнење на капацитетите на истражните центри, а со тоа и осамостојување на јавните обвинителства во водењето на истрагите, финансиските ресурси кои државата ги издвојува за оваа намена сепак не се доволни.
Ова го нагласил државниот јавен обвнител Љупчо Коцевски на денешниот работен состанок со истражителите од истражните центри во Основното јавно обвинителство за гонење на организиран криминал и корупција (ОЈО ГОКК) и во основните јавни обвинителства во Скопје, Куманово и во Тетово.
Работниот состанок, како што соопштија попладнево од Јавното обвинителство на Република Северна Македонија, е одржан во организација и во рамките на проектот „Поддршка на ЕУ за владеење на правото“.
На состанокот, информираат од Обвинителството, била анализирана функционалноста на истражните центри, се размениле искуства од досегашното работење и се дискутирало околу препораки за натамошен развој.
„Зборуваме за истражни центри, а ниту еден истражен центар не може да функционира и да одговори на задачите без современа опрема, без средства за преземање на истражните дејствија, за што сега во главно се потпираме на донации. Правдата е инвестиција на целата држава“,
рекол Коцевски, се наведува во соопштението.
Тој најавил посети на сите основни јавни обвинителства во државата, за време на кои едно од прашањата во фокусот ќе биде потребата за формирање на истражни центри и во други обвинителства со проширена надлежност.
„Доколку таква потреба биде препознаена, ќе ве повикам да ги споделите своите искуства и да го пренесете начинот на функционирање кој веќе дава резултати. Исто така, ќе ве охрабрам да ги користите и сите можности и канали за меѓуинституционална, но и меѓународна соработка кои дополнително ќе ви ја олеснат вашата работа и ќе придонесат за вашата ефикасност“,
додал државниот јавен обвинител на состанокот.
На состанокот свое излегање имала и јавната обвинителка за врски со Европравда, Ленче Рсистоска, која ги презентирала можностите за институционална меѓународна поддршка.
Во делот на финансиските истраги во соопштението на Обвинителството се наведува дека своите искуства околу начинот на нивно спроведување ги споделиле полициски службеници од Словенија.
„Истражителите самостојно преземаат голем број различни дејствија – прибирање документација, барања до институции, учествуваат при претреси и лишување од слобода на лица, а се ангажирани и во дејствија на меѓународна соработка со истражни органи од други земји“,
велат од Јавното обвинителство на РСМ.
Оттаму информираат дека дека бројот на предмети во кои постапувале истражителите од истражниот центар на Основното јавно обвинителство Скопје лани бил удвоен во споредба со претходната година.
Имено во текот на 2023 година истражителите на ова обвинителство постапувале во 287 предмети за разлика од 2022 година кога биле ангажирани во 150.
Од Обвинителството велат дека со поврзувањето со базите на податоци на Централниот регистар, на Министерството за внатрешни работи (МВР), како и со базите на Агенцијата за катастар на недвижности и на Агенцијата за вработување, е зголемена ефикасноста во постапувањето.
По целосното опремување на новите простории на Основното јавно обвинителство за гонење на организиран криминал и корупција, од Јавното обвинителство на РСМ додаваат дека значително се подобрени условите за функционирање и на овој истражен центар.